李嘉欣啱啱同許晉亨去完日本睇麥當娜演唱會，佢哋去到邊都十指緊扣，兩隻手好似黐咗膠水咁分唔開，好鬼sweet，有愛情滋潤嘅嘉欣，講句嘢都風騷過人，嘉欣噚日着到靚靚咁喺土瓜灣為「瑞士號黃金皇宮」做開幕剪綵嘉賓時，就好風趣咁話：「可能有膠水廣告，成件事就係為咗搵個膠水廣告拍，goodidea。」
提到早排有人用咗140萬投得「1L0VEU」車牌，跟住就傳個車牌係劉鑾雄投嚟送畀嘉欣，問嘉欣點睇？佢就話：「我諗太多傳聞，回應唔到咁多，我同傳媒一向都好合作，每日都有好多新鮮古仔，真係回應唔晒。」問嘉欣究竟想唔想收先？佢就唔肯答，不過最後都講話冇收過。
日本瘋狂購物
噚日置身喺黃金屋入面嘅嘉欣，顯得份外高貴，問佢如果男友許晉亨出動到黃金屋求婚嘅話，會唔會打動到佢呢？嘉欣口快快答：「等我搵個……」之後又再轉軚話：「我唔答呢啲問題。」之後嘉欣就澄清俾人話佢大肚嘅新聞，佢話只係着咗鬆身衫啫。
此外，嘉欣同許晉亨前晚9點幾喺日本返港，嘉欣身穿T恤同牛仔褲，見佢個肚又唔係好凸，不過佢就用件恤衫縛喺條腰度遮住個肚，許晉亨一馬當先推住成車行李步出，睇嚟佢兩個喺日本瘋狂購物，收穫甚佳。
