對俄羅斯嘅認識只限於木製俄羅斯娃娃，聞說「Balalaika」員工制服係俄羅斯傳統服裝，好期待。點知見到真人，有無搞錯？套衫竟然有啲似中國民族服，好彩純粹個Look似啫，內涵完全唔同，靚女Kathy話：「衣領同手袖上嘅花紋，都係傳統俄羅斯刺繡，好多唔同用途嘅布料都有㗎。」
望真，紅色絲質上衣的確幾搶眼，不過呢套衫唔係日日都着㗎，「套衫喺俄羅斯買番嚟，每件要成$400幾，通常大時大節例如俄羅斯國慶日咁，我哋先會換呢套絲質制服，平日着易刮花件衫嘛，所以會着番仿製布質制服，不過一樣咁靚。」制服顏色亦分等級，經理着黑色，Supervisor就着紅色，一般侍應就着白色，好易認㗎。除咗制服，仲見Kathy孭住個放滿樂器嘅袋仔，「餐廳有隊俄羅斯Liveband，夜晚會表演傳統俄羅斯樂器，有時我哋成班侍應會同客人一齊跟住玩，帶起個氣氛嘛！玩完樂器再繼續做嘢，個人都Relax啲。」寓工作於娛樂？又過癮喎。
記者：黃若茵
攝影：譚盈傑
俄羅斯羅宋湯$55
可以選擇配牛尾或豬手，俄羅斯食法必加酸忌廉，入口不覺太酸反而感受到雜菜真正鮮味，無平常羅宋湯過份濃烈嘅味精味。
古法醃喜靈魚甜菜沙律$65
傳統俄羅斯沙律，餡料有喜靈魚、蛋黃碎、俄羅斯紅菜頭、勺草等，沙律入口清新香甜，一般西式沙律好難食到呢種甜味。
羊架串燒$165
羊架捧上枱後淋Vodka點火，大火將羊肉面層烤至脆口，每次點火全場拍爛手掌。燒羊架配蘋果汁一齊食，更有鮮味。
Balalaika（35792929）
地址：中環蘭桂坊德己立街55號LKFTower閣樓