現時搭建竹棚架毋須向屋宇署申請，也無規定拆除時限，令部份貪方便業主，遲遲不清拆竹棚，造成潛在危險。
讀者張先生投訴，旺角亞皆老街103至105號後巷頂樓外牆，有一個竹棚架已搭建數年，一直未拆除。「呢個單位已經丟空咗幾年，門口得鐵閘，連木門都冇。個業主三、四年前就喺窗口外面個曲尺位搭咗兩個竹棚架，好耐都未見有人嚟開工裝修，但到𠵱家都唔肯拆番佢！」
屋宇署發信拆除
張先生擔心竹棚日久失修，會危及附近住戶與路人。「雖然呢兩個竹棚起喺大廈後巷外牆，但呢條後巷對住間茶餐廳，冇幾遠嘅馬路又係小巴站，平時好多人經過。個竹棚日曬雨淋咁多年，已經變得好殘舊，真係好驚有日打大風時會突然散晒跌落嚟！如果啲竹周圍飛，對樓下住戶同途人可能會有危險！」
屋宇署回覆稱，接獲本報轉介後，即派員到上址視察，發現有一竹棚搭建於亞皆老街103A號外牆。從現場所見，竹棚並沒明顯破損或即時結構危險，但該署已去信上址單位，要求業主或住客於工程後盡快拆除竹棚，有關業主同意盡快跟進棚架問題。
屋宇署指出，為加強竹棚安全，該署發出《竹棚架設計及搭建指引》，列出設計、搭建及使用竹棚架之技巧要求，供業界參考，但搭建竹棚架則毋須向該署申請，且有關指引又沒有規定清拆棚架之時限，但有列出竹棚於工程完成後，應立刻拆除。當屋宇署發現竹棚欠妥善，可向有關業主發出清拆令，要求把竹棚架拆除。
檔案編號：0817031