噚日為大家詳細介紹過SONYPS3嘅實玩報道後，本來一心諗住今年TGS已經冇乜睇頭，因為任天堂重頭戲碼Wii缺席，點知行過世嘉個展館，駭然發現擺咗部Wii出嚟做示範！雖然並未公開畀入場人士試玩，不過仍吸引過百機迷駐足觀看，有啲仲好「電車男」地跟住ShowGirl跳㖭！
記者、攝影：陳國輝
世嘉力谷Wii新Games
新世代主機爆發戰要等到11月11日先會由PS3帶頭引發，睇番現役主機之中雖然仲有新Games推出，不過號召力始終唔及XB360及即將見街嘅Wii咁勁；而且今年SONY仲只剩番PS3以及PSP遊戲有得試玩，完全忽略晒PS2，睇嚟SONY嘅舉動已經相當明顯，誓死打低Wii咁話！
查實任天堂每一年都冇踩隻腳入TGS，不過新機Wii就快出爐，就算佢自己唔主動出擊，好多遊戲大廠都免費幫佢宣傳啦！但奇怪係大部份E3出現過嘅作品，喺TGS裏面居雖蒸發晒，反而從未曝光嘅新作呢度就有得玩，相當令人意外！其中喺SEGA會場就發現咗3隻Wii勁Games，試玩ShowGirl仲着晒生果露背裝，拎住個手掣「左Fing右Fing」之餘仲夠晒Cutie，極投入嗰隻！
世嘉×Wii大作
《Sonic~秘密的指環》（07年中推出）
SEGASonic系列嘅第一款Wii遊戲，過癮在打觔斗時需要雙手不斷打圈，諗起呢啲騎呢動作都幾搞笑！
《SuperMonkeyBall》（12月2日推出）
捉猴系列首次殺入Wii，玩家可選擇唔同嘅運動種類，例如跑步、跳繩以及碌保齡等，可以好輕鬆咁過關，亦可能令你玩到索晒氣！
《BLEACH~白刃輪舞曲》（06年12月推出）
畫面好漫畫化，玩家拎住個手掣嗰陣就好似揸住把佩劍一樣，除咗揮刀劈友，仲可以出絕招㖭！
齋望評語
日本：12月2日推出，售25,000日圓（約港幣$1,667）
歐美：11月19日推出，售249.99美元（約港幣$1,946）
＊連《WiiSport》遊戲
XB360出爐大作唔多
為咗力撼SONY，微軟甚至連會場都選擇喺另一邊Hall3布置，好似楚河漢界分得咁清！雖則冇任何新機發布，就算周邊如HDDVD光碟機都係得個望字，並未有任何高清影碟示範，不過單係《藍龍》已足夠吸引機迷排隊等玩！
玩盡《藍龍》要60小時
試完《LO》，坂口拿拿聲拎隻《藍龍》玩畀大家睇，專登揀咗個後期章節示範，但讀碟情況未如理想，實時運算嘅過場畫面不斷係咁Load，搞到唔少人瞌眼瞓！到玩完一輪，發覺佢有類似《ChronoTrigger》嘅時間制排隊行動系統，戰鬥方面又勁有《Persona》影子，加上人設似《龍珠》，平時移動又似《DQ》，可謂集天下大成於一身！坂口透露《藍龍》第一次爆機要40個鐘左右，玩晒隱藏要素就要另加20粒鐘。日版《藍龍》喺12月7日推出，國際版則預計喺明年。
《FF》之父等住省招牌
今屆XB360陣營重頭戲當然係離開咗Square好幾年、𠵱家做咗Mistwalker老闆嘅坂口博信。坂口為XB360瞓身搞嘅《LostOdyssey》同《藍龍》，似足市場上兩大超人氣RPG《FF》同《DQ》，更有青出於藍之感，為佢買XB360都唔算誇張！佢仲應微軟邀請為全球媒體舉行記者會。
《LostOdyssey》勝過《FF13》
先講搵嚟《男兒當入樽》作者井上雄彥做人設嘅《LostOdyssey》，畫面水平高到嚇死人，千軍萬馬場面勁有《魔戒》影子，睇真啲仲有超濃厚嘅《FF》味道。
戰鬥演繹手法頗似《FF》，無論視點或細微地方都做到好足，例如被打瓜嘅敵人屍體依然會保留響戰場上，而首隻大佬嗰兩碌炮就算斬爆咗，殘骸都會跌喺旁邊畀你清楚睇到。加上播片同實時運算間夾得近乎完美，令人以為所有CG都係Pre-render！筆者認為開發緊嘅《FF13》都未及得上佢，相信會係微軟甚至坂口嘅響朵之作。
直擊記者：福田
漫畫角色殺入PS2
今年PS2冇晒聲氣，好鬼夕陽主機Feel！講到最撐PS2嘅廠商，竟然唔係SONY自己，而係BandaiNamco喎！小記未行入呢個會場之前，已經聽到好多熟口熟面嘅樂曲，再睇吓頭頂上嘅超大銀幕，原來播緊《龍珠》同《足球小將》嘅PS2版遊戲！雖然現場只係播緊Opening片段，但仍然有大班人圍住唔肯走，證明PS2仲有大廠力撐，未有咁快被淘汰嘅！
《OutRun2SP》（06年推出）
終於輪到PS2版推出，畫面幾乎拍得住早前街機版同XB360版嗰隻《OutRun2SP》，例如車尾死氣喉會噴出黑煙，另外行過水池嗰陣仲會濺出水花等，甩尾感覺良好，兼且像真度頗高。
《足球小將》（推出日期未定）
廠方只播放Opening片段，但睇見全新設計嘅3D版戴志偉、小志強及健威等經典角色，加上漫畫化射球動作，已夠漫畫迷回味無窮！
《龍珠ZSparkerNEO》（10月5日推出）
畫面繼承上集嘅畫風，3D打法都幾相似，但今次着重交代故事情節，而且仲有唔少劇場版古仔及人物登場，等你唔使齋打咁悶！
《人中之龍2》（12月7日推出）
早前喺本港推出嘅第一集口碑不俗，但銷量麻麻。第二集嚟到日本TGS會場就好多機迷排晒隊咁等玩！畫面依然採用全3D，大大個場景畀你周圍走，得閒仲一個打幾個！
《戰國無雙2：Empires》
（11月16日推出）
光榮另一搶錢系列，不過有別三國時代人物，喺香港受歡迎度只一般，但㗎仔卻愛死佢，所以現場都引到唔少人試玩。
XB360其他精采勁Game
《DOA沙灘排球2》（11月22日推出）
可能係試玩版關係，始終覺得動作唔係咁流暢，例如揸緊快艇嗰陣出現小量窒格，但角色造型仍然好鬼Sexy。
《WINNINGELEVEN10》（未定推出日期）
隔籬PSP、NDS版嘅《WE》都有得試玩，唯獨係XB360齋喺LCD上面播片，睇過部份畫面已經好靚。
《TOMBRAIDERLEGEND》（10月5日推出）
可算係PC移植版，嚟到XB360，畫面媲美PC版，而且動作及射擊等畫面都好流暢。
美女後巷，睇咗先講！
除咗廠商請嚟嘅美女ShowGirl外，仲有自發性嘅Cosplay出現，喺幾個展館間嘅露天後巷度排陣，方便一大班Cosplay同好圍住影相，好多受歡迎嘅Cosplay往往排晒長龍，輪到你影嘅話，仲任你「點佢」擺Pose都得！淨計上午嘅話，已超過50位Cosplay到場；小記見到現場約2、300人不停輪候，最長嗰條龍睇怕冇20分鐘都未輪到你！
明日預告：PSPVsNDS
講咗兩日家用遊戲機嘅新動向，聽日會為大家報道埋另一戰場──手提機嘅兩家之爭。PSP以GPS、專用鏡頭等硬件做力Sell賣點，而NDS則以大量過癮新Game擺陣。鹿死誰手？下回分解！