一曲口哨國歌成為絕唱嘅煲呔，噚日借住收錢台節目《志雲飯局》自我平反。上電視時冇打煲呔嘅煲呔話：「自細都有㗎啦，我𠵱家日日都keep住吹口哨㗎，（例如）對住啲魚呀！特別係嗰段時期想放鬆心情嘅時候呢，我就自自然然吹口哨㗎喇，𠵱啲係我不嬲嘅習慣。」
煲呔舊年喺爆出老董下台消息之後，行經下亞厘畢道準備見董建華嘅時候，被傳媒影到佢以口哨高奏國歌嘅樣。八方同700萬港人都唔係煲呔肚裏面條蟲，冇法子明白佢用口哨吹出咁悲壯嘅國歌，反映乜嘢心情。
「我唔知(吹口哨)俾人覺得我輕佻，實情我覺得自己好自然，唔係有心……人哋唔知我有個弱點，就係心無二用；所以我唔想諗嘢嘅時候，就會專心吹口哨，等個腦就唔會亂咁走去第二度地方。」煲呔喺《志雲飯局》度始終冇解釋點解咁多歌仔佢唔吹，偏偏喺嗰個時候吹國歌，主持陳志雲亦都冇問，淨係一味好恭敬咁「哦！哦！哦！」
講完自己個腦，煲呔又講到自己個名。原來佢同國家領導人曾憲梓同輩，都係曾氏大族第74代。但係佢冇按族例，用憲字做名，原因係佢嫲嫲破例，用咗個蔭字，寓意祖先庇蔭。