日前國家領導級人物全國人大常委曾憲梓家族鬧出婚變醜聞，曾憲梓二媳婦吳嘉寶，喺報章登告示指自己同丈夫曾智雄正式分居，並指控丈夫同楊姓女藝人有染。事件引起全城關注，凡是楊姓女星都牽涉入內，而曾家一家人更成為被追訪對象，噚晚曾憲梓老婆曾黃麗群現身尖沙嘴出席「仁愛堂名人名曲慈善演唱會」活動，佢一到場即時被大批記者追訪，但第一個問題唔係問佢個二仔嘅婚變，而係問有傳黎瑞恩又再大肚，曾老太即時否認話：「唔係啦，個仔啱啱至得一歲。」
之後記者至開始問佢有關個仔同二新抱嘅婚變，佢話：「我冇嘢講。」但吳嘉寶之後接受訪問又突然話唔知邊個係楊小姐，曾老太聽完就話：「佢喺加拿大，好耐冇見啦。」但問佢有幾耐冇見，佢又唔答，至於問佢今次件事會唔會係二新抱追贍養費，又或佢財政上出現問題，曾老太就話：「我點知呀？我相信我個仔好負責任。」覺得佢哋會唔會復合，曾老太謂：「我點知呀？都咁大個人，係人哋父母啦，識點做人，我哋呢啲上一代點理得咁多。」當問到佢新抱講話楊小姐介入佢婚姻，但轉頭又話唔知邊個係楊小姐，會唔會覺得新抱出爾反爾，曾老太話：「我唔知邊個係楊小姐，冇嘢講，多謝大家。」