中信國金（183）4月初受入股中信銀行消息刺激，股價一度裂口大升，最高見5蚊，之後持續喺三角形內整固，噚日輕微突破降軌，收報4.32元，升7仙，動力再現，現價博得過。
喺「香港討論區」內，網友dayzman認為，183幾抵買，中信銀行遲啲會嚟香港掛牌，前景唔錯。此外，呢兩日成交增多，但唔係咁多人留意呢隻股，係好現象。
另一名叫「要做資產管理啊」嘅網友睇完dayzman留言後，自言「我都有啲心郁郁……」。
內地經濟增長強勁，金融業前景看好，中信國金除持有中信銀行股權外，近日有報道指旗下中信嘉銀全資子公司中國國際財務將會轉型，有機會升格為銀行，加埋母公司中信集團喺內地嘅人脈網絡，中信國金又多幾分投資價值。
集團上月中公布上半年純利大跌32%，股價一度裂口滑落，但4蚊附近有支持，近期形成小圓底回升。技術上，股價喺三角形內運行咗半年，噚日升穿，兼有成交配合，係向好訊號。
此外，現價企喺10、20同50日線之上，保歷加通道收窄後向上撐闊，MACD亦有突破0線之勢，RSI明顯升破降軌，皆為轉強之勢，短期有力挑戰4.60元，以保歷加通道中軸4.15元作止蝕。
余文