街頭騙徒竟敢在解放軍頭上釘蝨乸！浸會大學學生connellkei在大學討論區表示，日前上學時，在解放軍九龍東軍營外遇上一個貌似經濟學者張五常的老伯，該長者手持雨傘站在聯合道軍營大閘附近，「佢好多時伸手叫啲途人，佢叫過我，不過我冇睬佢。到底佢叫人做乜呢？」
原來這是浸大學生「老友」，已在浸大附近出沒多年，有人更直斥他是騙子，每次均聲稱冇錢搭車，藉詞向途人索取金錢，「佢問我攞廿蚊，我話搭巴士連小輪過海，畀5蚊你都夠。」蛋蛋微波爐指這老人在大專界已臭名遠播，「呢個阿伯間間大學都去過㗎嘞，喺大學界好出名。」francesfrances則說除了這個老人外，年前有一女子經常在浸大新校園外向學生兜售電腦磁碟。