塞翁失馬，焉知非福？何俊仁被人扑濕之後，得到廣大市民同情，民望飆升，真係不幸中之大幸。既然係咁，咁佢領導民主黨，可能真係最適合不過，至少愛屋及烏情況下，市民可能都會對民主黨有更多支持。八方咁講，唔係叫仁哥學泰國軍方去奪權，事實上係高達李永達噚日正式宣布唔會再玩，反而推舉「紅運當頭」嘅仁哥接棒做主席，擺明畀個位仁哥更上一層樓。
據知白鴿黨唔少黨友都係噚日先聽到高達唔選呢個消息，所以都幾愕然。不過高達澄清，絕對唔係因為仁哥被扑民望急升之後，先有讓位呢個念頭；佢自己早喺7、8月已經有退隱打算，可惜嗰排又撞啱好多嘢發生，咪拖到噚日先講。
無諗過搞夫妻黨
點解要揀仁哥？高達話仁哥都唔係第一次俾人推薦做主席，只係佢次次推咗，白鴿黨先至搵人上。但到咗今時今日咁嘅地步，覺得仁哥真係唔可以再推，最希望仁哥可以用平時「好好先生」乜都話「好呀」嘅態度，答應接受挑戰去選主席。
高達就係覺得仁哥比較nice，唔似自己咁率真咁硬，未必肯聽太多意見，相信都會得到黨內兄弟支持。當然，佢咁講，唔係代表佢話自己唔受兄弟歡迎。八方都有問過佢，係咪因為心淡或者黨內兄弟內訌等問題而走嘅，強調黨內有唔同意見，從來唔係問題，強調自己一直都唔想做。
佢又話連副主席都唔會選㗎喇，最多選中委或中常委。之前有人笑佢哋搞女副主席，其實就係安插老婆陳樹英上，喺黨內搞夫妻黨。高達重申一路都唔係諗住tree姐陳樹英做，自己心目中有另一個心儀之選㗎；而佢退落嚟，亦都可以用行動證明唔會搞夫妻檔等核突嘢。
八方記得仁哥講過好多次唔選唔選，今次其實佢都係咁嘅意向。噚日先知高達唔選嘅仁哥話截至呢一分鐘為止，都唔想做，唔想放棄𠵱家工作，希望高達留任。只可惜，高達呢鋪先斬後奏，獲得唔少黨內大佬支持，噚晚佢哋坐埋食咗餐飯，就係游說仁哥接手，擺明都係迫仁哥上轎，無得sayno，八方真係要開定香檳同佢慶祝至得。