侍仔：去完旅行返嚟，一身爽晒！叉夠電今晚再單挑馬會！
招積域：唓！去深圳幾日就話爽晒！
菠蘿文：今晚又有波賭，仲要係強弱對決，又可以整條大波膽3串7，過番個肥中秋節。
侍仔：拜仁、AC同埋車仔大波膽串埋一齊過關？
招積域：3隊入面，我只覺得拜仁同車仔會開大，如果要再揀多一隊，我就會揀雷丁對曼聯。
菠蘿文：雷丁主場今季未輸過，唔會咁易輸大大鑊啩？
招積域：又唔係輸大大鑊，只係會同曼聯鬥攻啫！輸3球入番4球，早兩季狼隊都試過啦。
林伯：你博曼聯反底都算啦，唔好咁低智慧以為曼聯係李斯特城。曼聯專門破人哋紀錄，早季阿仙奴49場不敗又衰喺佢手上，今次雷丁算乜嘢？阿仙奴嘅紀錄都可以破，一定過硬雷丁呢關！
曼聯專破紀錄
招積域：你隊車仔點樣呀？專門輸喺非強隊手上。
林伯：我架車一定炒到富咸飛起都似！有強勁後盾施治，打「1-0-9」戰術都仲可以！
侍仔：夠鐘食藥啦阿伯，車仔出名唔會狂攻，佢對住富咸「9-0-1」，都係老鼠拉龜。
菠蘿文：唔好拗啦，再講阿伯就搞事㗎喇。
侍仔：阿伯，你最鍾意邊個球評家呀？
林伯：個個都鍾意，只係唔鍾意啲人成日講數據，好鬼悶，睇佢網上專欄又多廢話。
侍仔：你唔好彩啦，佢將會喺收費頻道亮聲。
高洛文