呢排一班中港台名人藝人真係有得震冇得瞓，皆因繼早前有網友公開咗一班明星嘅手機號碼、住址同考試成績後，最近網上又流傳佢哋嘅網上通訊QQ（類似MSN）號碼，受害人包括劉德華、周杰倫、超女李宇春、張含韻、周筆暢同中國欄王劉翔等等，佢哋嘅經理人都立即通知佢哋停用或更換號碼。
周杰倫終身冧巴
有內地記者嘗試聯絡一啲QQ號碼，發現劉翔嘅QQ號碼係喺上海登記，QQ名係飛翔，暱稱翔翔；至於劉德華嘅登記地方係香港旺角，QQ名係AndyLau，登記年齡同佢真實年齡一樣，都係44歲。因為佢哋都冇online，所以唔知真定假，但記者嘗試將呢啲號碼加入好朋友之列，對方就顯示拒絕加為好友。
曝光嘅QQ號碼中，以周杰倫五位數字最特別，內地傳媒打去發出嘅公司求證，佢哋證明呢個終身冧巴係佢哋03年送畀周杰倫嘅，李宇春嘅經理人就話：「她有好幾個QQ號碼，有的用來打遊戲，有的用來交流。」一班網友們對於藝人嘅QQ號碼曝光紛紛表示有侵犯私隱之嫌，話要聲討搞呢啲惡作劇嘅人，仲有經理人話：「藝人都是人，最基本的權利應該得到保護。」
