為人父母，一定好愛錫自己仔女。噚日公民黨灣仔黨部開張慶典，喺芸芸達官貴人中，出現咗一對講上海話嘅老夫妻，原來佢哋係Audrey余若薇父母。得知愛女有喜事，都專程跑嚟睇睇，明顯好錫Audrey。
Audrey話細個覺得爹哋好惡，大個就覺得佢係全世界最「腍」嘅人。80高齡嘅余爸爸話囡囡一路好獨立兼好叻，嚇得身旁嘅Audrey好唔好意思，結果由余媽媽打圓場，叫八方寫Audrey細個好曳喎，真係鬼馬。問余爸爸支唔支持囡囡選特首？佢話呢啲係囡囡嘅事，從來都唔管㗎。
公民黨雖然同煲呔鬧翻，但仲有好多朋友嘅。好似冬冬、周一嶽同林D9都有到場，當然唔少得同聲同氣嘅律政司司長黃仁龍，仁龍仔仲話煲呔叫佢代祝公民黨開張大吉。
其他黨派中則以民主黨最畀面，馬丁、高達、張文同阿涂有到；民建聯都有曾鈺成同蔡菜子出現；自由黨人唔到花籃到；泛聯盟人同花都無到，原來實際地捐款當送禮。李卓人、馮檢基同李鳳英都有嚟，算好有心。
大律師公會前主席陳景生同佢哋咁老友，當然都有出席。佢話無幫手睇風水，唔知地方正唔正。佢又話自己係Recorder（特委法官），應該唔可以參與選委會選舉。