繼本月11日資深藝人關海山病逝於廣華醫院後，資深藝人鮑方叔也離大家而去，他昨日下午3時30分於律敦治醫院病逝，享年83歲，在大女兒鮑起嘉、兒子鮑德熹及女婿方平陪伴下安詳離去，二女兒鮑起靜因拍劇而趕不及見老父最後一面。
鮑方原名鮑繼煥，一生奉獻香港演藝界，是一個努力不懈的藝術工作者。昨日下午，鮑方的大女兒鮑起嘉、細仔鮑德熹以及女婿方平陪伴下，在律敦治醫院辭世，享年83歲。由於二女兒鮑起靜在深圳拍劇，故未趕及回港見老父最後一面。
人生盡頭身體虛弱
方平於下午四時多步出病房公布岳父的死訊，他說：「喺3點30分見到佢走，其實大家有晒心理準備，佢中咗風都有七年幾，一路情況都係咁，而呢幾日情況就特別差，醫生都有講過吓。」問到鮑方叔因何病離去，方平續說：「主要係個人身體弱，衰老，人生係咁。」
方平又透露鮑方離世前已未能多說話，他說：「佢清醒時只係記得啲好耐以前嘅生活瑣事，佢喺呢幾個月嚟反覆咁出入醫院，呼吸方面有問題，我原本喺內地拍緊《新不了情》都突然有預感，即刻趕返嚟，好彩Peter（鮑德熹）喺度，上次媽咪走時，啲仔女唔喺香港，所以剛才喺佢耳邊同佢講，話大家姐同Peter喺度，就睇住佢心跳慢慢由130，70咁一直降低，直至變成一條直線，最遺憾係鮑起靜唔喺佢身邊。」
獻身藝術兩袖清風
緬懷鮑方的一生，方平一邊流着淚一邊說：「爸爸雖然拍過好多電影同電視劇，但佢一直好清貧，冇享過福，佢唔單止係我外父，仲係我老師，我曾經主演過一部佢執導嘅電影。」
鮑方二女兒鮑起靜在下午4點30分匆匆趕到醫院，可惜未能見老父最後一面，她在病房逗留了20分鐘，之後神情哀傷地接受訪問，她說：「好在家姐同細佬喺度，爹哋走得幾好，佢中咗風七年半，受好多苦，感覺好似解脫，唔使咁辛苦，不過都有啲唔捨得。」至於身後事如何安排，鮑起靜稱因自己還有通告在身，所以亡父後事會交由弟弟處理。
陳錦鴻讚謙虛長者
此外，陳錦鴻昨日在將軍澳電視城表示與鮑方叔、其女兒鮑起靜及女婿方平都合作過，對鮑方叔的離世感到非常惋惜，他說：「鮑姐飾演過我阿媽好多次，所以同佢一家都好熟。同鮑方叔合作過，對佢印象最深係佢嘅工作態度，佢成日嚟到拍攝現場都話自己冇睇劇本，驚唔記得對白，其實佢次次一早就睇晒劇本，有晒準備，諗好點去演繹個角色，佢真係一個好謙虛嘅長輩。」
採訪、攝影：陳俊強
