望到Ramita同Menuka一身制服，有無似曾相識嘅感覺？我就有呢，記得上年德國啤酒節，我就見過着呢啲制服嘅德國啤酒女郎通場飛，一杯一杯咁幫客人斟啤酒。佢哋喺「KingLudwigBeerhall」做侍應，一身藍色碎花連身裙配白色公主袖上衣，望落就勁靚嘞，但胸口至小腹有成排束腰帶，會唔會唞啖氣都辛苦呀？Ramita話︰「唔會，好舒服，着住佢可以滿場飛送啤酒拎畀客人。」制服由餐廳特地從德國訂購返嚟，着上身有乜感覺？「套制服好襯間餐廳呀，夜晚坐滿晒人咁好氣氛，如果着住普通黑衫黑褲，客人見到都無Mood啦。」晚上餐廳仲有Band唱歌助興，客人High起上嚟有時會聞歌起舞，「着呢套制服好易投入氣氛，真係想跳埋一份呀。」
記者︰方綺君
攝影︰周旭文
德國包籃$60
一籃有三款包，農夫包鬆軟，啤酒麵包條外脆內軟充滿麥味，啤酒麵包圈上灑粗鹽口感煙韌，點自製牛仔肝醬同香草火腿忌廉芝士醬，味道更佳。
德國腸拼盤伴燒薯、酸椰菜及薯仔沙律$185
有齊波子香腸、牛仔腸、香草豬肉腸、雞肉腸，前兩者浸熟，後兩者放烤盤上烤熟，味道有濃有淡，好飽肚。
脆皮燒豬肘$125
預先醃好的德國豬肘到港用啤酒先浸一晚，再加香草、醋同啤酒浸煮，不停灑啤酒慢火燒烤，保持到肉質Juicy。
KingLudwigBeerhall（23698328）
地址︰尖沙嘴梳士巴利道九廣東鐵站地面32號（J出口）