國泰航空噚晚喺沙田馬場慶祝60歲生日，除了特首曾蔭權做主禮嘉賓，更是官賈雲集，賭王何鴻燊、霍震霆，周梁淑怡、廖秀冬、鄭汝樺都畀面出席。
中信泰富係國泰股東，主席榮智健同董事總經理范鴻齡一齊到賀。中國國際航空今年中同國泰達成互控協議，董事長李家祥仲專登買咗幅蘇州絲繡送畀國泰，李家祥話幅絲繡有座大山，寓意國航同國泰的合作關係如山一般牢固；認真有心。
酒會上國泰安排演奏同唱歌表演，當然唔少得歷年空中服務員制服貓步環節。國泰仲趁機會展示長途客機的新座位設計。頭等、商務同經濟艙的座位都會換上較有私人空間同闊落的座椅，首架全部用新座椅的飛機07年接收，新舊長途機會陸續換，直到09年國泰機隊總數達到135架時，有一半飛機用新椅。在油價不斷蠶食利潤時，國泰仍然落本買飛機同改善服務，似乎對前景好有信心。
