賜官愈老愈有型，兩執白鬚迎風飄盪，成個得道道士咁款，如果學佢老師牟宗三當年站在新亞圓亭外草地，翹首望天，雙手互握於背後，再加鬚從風起，想張三丰亦不外如是。
問賜官如何考入新亞書院哲學系？賜官話：「當年考中大，成績表唔派番畀學生，我至今仍然唔知當年入學試係乜嘢成績，只知收到面試通知書，於是去新亞書院，由牟先生面試，佢問我有冇讀過哲學，其實我冇，不過人急智生，話讀過莊子《秋水篇》，立即念咗幾句『秋水時至，百川灌河。涇流之大，兩涘渚崖之間，不辯牛馬。』牟老師點頭稱善，咁就收咗我！」賜官想知道中大入學試成績，好易啫，聽滙豐鄭大班講，佢上網申請，幾日後就收到佢嘅中大入學試成績表以及新亞每年每科成績表，賜官不妨一試。
賜官每年暑假返多倫多探妻女，九月就返嚟，在中大港大浸大教書，由編劇以至古今神話迷信，學生多到爆棚。問佢當今大學生水平如何，佢話：「中學基礎教育唔掂，讀中國語言，不讀中國文學，好似學英語咁，根底係差啲。以前我哋讀國文，古文讀得好，語言掂晒，𠵱家一分為二，惡果浮現。我教二年班學生選修科──『編劇』，開宗明義話要運用『賦比興』三種基本方法，再加變式。點知成班學生眼望望，於是我問：大家知唔知何謂『賦比興』？只有兩個學生舉手，原來係中文系嘅。我叫學生抄低，好多學生唔識寫個『賦』字，於是我畀貼士，唔係牛仔褲個褲，唔係大富豪個富，係貝字旁，佢哋仍然有人唔識寫。以前中學先生教國文就講賦比興啦，唔會入咗大學先至學，你話𠵱家中學中文教啲乜？」
如果學生有讀《中學生文學精讀》（周錫馥選注，三聯出版），佢哋會識嘅，左丁山兒子有呢本書，第九頁就引朱熹講：「賦者，敷陳其事而直言之也（描述）；比者，以彼物比此物也（比擬）比喻；興者，先言他物以引起所詠之辭也（感觸、聯想）。」現時極少學生在中學選修中國文學，唔識賦比興，不足為奇！