美股回落80點，日股跌近200點，外圍市況如此惡劣，恒指收市只係微跌19點，剛好收高於17600，市底真係好強。成交大增至500億元，扣除招行（3968）首日掛牌大成交以及思捷（330）配股上板，亦有300多億，交投依然活躍。
恒指全周升363點，5個交易日中4日係陽燭，突破17500大位後，阻力變成支持，昨日外圍弱勢如斯，恒指都跌唔穿17500，可見有大戶力守，後市只要跌唔穿此位，中線升勢應該未完。
下周留意順誠升岡
嘉利盈（8029）沽完貨後仍要留意，等跌返落0.5元左右才考慮翻兜，若然下周初再狂飆，亦唔會心急高追。倉內有隻股票出現異動，聯康（690）一度跌逾5%，但係尾市抽返上3.78元收，僅跌0.02元，有驚無險，暫時視作震倉。
高寶（274）果然出現突破，昨以大陽燭突破旗形，保歷加通道進一步擴闊，新升浪好大機會已經展開。廣南（1203）同富豪（078）繼續呆滯，旗形整固已行到尾聲，如下周初再無突破，要搵過第二隻炒。上電（2727）微跌一格，剛守住2.5元止蝕位，已到整固尾聲，係時候突破。個市處於6年幾高位，氣氛漸熱，近日細價基金股有勢重新起動，下周會昅實順誠（531）同升岡（485），等造旗時吼位買入。
趙飛雲