英皇都保釣？唔係白金漢宮嗰個英女皇，而係香港嘅英皇集團。根據八方噚日喺筲箕灣避風塘收到嘅料，一向好少公開反日嘅英皇集團大股東楊受成，今期忽然保釣，出錢出力，唔淨止私人捐咗20萬畀保釣行動委員會，仲派出旗下歌手出席下月底喺紅館開嘅保釣愛國之夜演唱會。
楊生捐錢唔係好出奇，今年棠哥搞嘅慶回歸大巡遊都有佢份，仲捐咗成百萬。如果楊生支持保釣好比對待左派慶回歸，捐夠一百萬，咁保釣人士就唔係咁頭痕。負責募捐嘅保釣行動委員會總顧問劉夢熊話，要籌多百幾萬先可成行。
除咗楊生，金勞詹都捐咗20萬，史泰祖醫生就捐咗10萬，劉夢熊自己就出咗一百萬。保釣行動時間暫定喺下個月底，人數大約六、七十，以登陸插旗、安營紮寨作為終極目標。
為免再被日本海上自衞隊撞沉船，今次遠征嘅兩艘船已經改良咗。兩艘船都係漁船改裝，一隻叫保釣二號、一隻叫釣魚台二號。保釣行動副主席羅就話，以前就係日本仔由高向下望住佢哋，今次就會係佢哋由高向下望番日本仔轉頭。
陳毓祥逝世10周年
今年保釣行動可以話係對十年前以身殉國嘅陳毓祥嘅一個交代。三日之後，就係陳毓祥喺釣魚台水域遇溺身亡10周年，保釣行動喺佢死忌前夕（下星期一）舉辦悼念集會，地點係遮打花園。
可能係陳毓祥逝世十周年嘅感召，今年保釣零舍多奇人異士。除咗楊受成，來自中資銀行嘅鄧先生都打算挺身而出。鄧先生噚日同成班保釣成員上船拜神，保佑保釣成功。佢毅然保釣，唔止係因國仇，仲有家恨。事緣鄧老太生於日軍佔領香港嘅時代，日軍迫令市民兌換軍票，鄧老太家陣仲有十萬元軍票喺手。