本屆世界盃後，發覺鍾意德國波嘅球迷真係增多咗唔少，可能係德國辦得唔錯之餘，國家隊亦打出風格有關啦！
而且今屆德甲戰況都幾緊湊，幾支「升班馬」都證明自己並非魚腩，反而係魚骨，對手輕敵就真係好易鯁親。幾支熱門球隊不時死火，拜仁出現後波歷克現象，史浩克04又太過繫於連干嘅狀態，總之各有各問題，好睇在冇一隊波超晒班一枝獨秀嘛！
數德甲列強，點可以漏咗今日兩隊主角漢堡同雲達不來梅呀！主隊漢堡開「咧」到𠵱家踢咗10場正式賽事，只係試過喺盃賽度贏過哈化，其餘9場，只得6和3負慘淡成績。雲達華治受傷，加上巴巴斯以及艾列頓離隊，攻力的確跌咗watt；漢堡雖被喻為上屆德甲最強防守，但係條新後防線默契好似仲爭啲，攻守都差咗，又難怪開季賽績唔對路。
近3季對賽未輸過
不來梅今場有高路斯復出，拍住穆罕默德施丹，相信攻力絕不比「雙K」（高路斯拍卡斯歷）配搭弱。上場對史特加，廸亞高繼續有好表現，中堅梅廸薩卡有望獲正選，應可改善後防。不來梅在整體人腳、球員心理及狀態兩方面，都在漢堡之上。季初盃賽，不來梅曾勝過漢堡外，近3季7次對賽，亦有4勝3和不敗之紀錄。瓣瓣贏晒，平手盤一於捧雲達不來梅。
強尼
有線球彩台主持
電郵：[email protected]