蘭西情報課:<br>青龍頭地皮有價帶挈海慧炒家

蘭西情報課:
青龍頭地皮有價帶挈海慧炒家

上個禮拜政府拍賣荃灣青龍頭地皮,結果由新地高價奪得,雖然冇指標作用,但原來都帶挈部份業主同炒家賺錢出貨。美聯分行營業經理熊超凡報料,屯門海慧花園1座中層A室,1298方呎,炒家剛以330萬摸出,執到30萬,賺一成。
話說個炒家喺8月用300萬買入呢個單位,低市價些少,仲攞到兩個幾月成交期,跟手就放售,叫價340萬,冇乜反應,但上個禮拜賣完地後,市況好番啲,個單位冇耐就由用家以330萬承接。熊超凡話屋苑呢類摸貨個案好罕見,估計係借賣地消息至出現。不過,普遍業主都冇因為賣地成績好而調高叫價,非常冷靜。

佢補充,自從賣完地後,青山公路一帶多咗好多客搵樓,再加上風水師話呢頭有運行,所以睇樓客數目大增,睇親仲係過千呎嘅大單位或者係啲特色戶,郁吓手都要500萬以上。
熊超凡指出,想短炒嘅,𠵱家區內只有豪景花園或者一啲名不見經傳嘅物業,業主先有機會畀4至5個月長成交期個買家,咁啲炒家就要留意嘞。
電郵地址:[email protected]