牛鞭，唔難頂吖，咁牛荔枝呢？肉酸少少咁囉，勉強都頂得順嘅，原條鱷魚仔又點睇？嘩，好核突。係核突㗎，有食肆見入秋開始推出新滋補養顏燉湯，牛荔枝、牛鞭、鱷魚仔男女都啱飲，其實不過係飲湯啫，眼不見為亁淨嘛，合埋眼質入口吞落肚補一補喇。記者︰方綺君
攝影︰楊錦文
模特兒︰Bianca
入秋推出滋味燉湯
秋風起三蛇肥，不過𠵱家仲未係食蛇時候，想補一補潤一潤？去「橋底辣蟹」無衰。老闆黃先生話︰「每年一入秋我就開始做燉湯，啲湯要燉最少四粒鐘，要早一日預訂喇。」今年大廚梁師傅仲推出新滋補靚燉湯︰「好似老雞燉鱷魚仔湯呀，皇帝補身湯咁呀，裏面有鱷魚仔又有牛鞭，好補。」雖然未煮熟成身粉紅色嘅鱷魚仔好醜樣，不過知道飲完皮膚滑滑，我飲。
呢間舖仲有牛荔枝供應，模特兒Bianca問︰「牛荔枝係乜？」梁師傅拎上枱：「牛睾丸，改個名做牛荔枝好聽啲嘛。」牛荔枝可以打邊爐，又可以切片炒。師傅見我望住咁大抽牛荔枝面有難色，就話︰「其實同雞子一樣之嘛，只不過佢大粒啲，所以要切片食囉，唔使怕喎，試吓啦。」雖明知色香味俱全，亦見其他食客食得津津有味，但我始終過唔到自己關口，唔敢食。
1.老雞燉鱷魚仔湯$580
新出品，男女都啱飲，原條鱷魚仔加海馬、川貝、南北杏等藥材用猛火燉4小時，味道超濃。梁師傅話︰「鱷魚仔有好多骨膠原，飲完皮膚靚靚，有紓緩哮喘功效㗎。」
2.皇帝補身湯$580
新出品，內有牛鞭、老雞、金華火腿、杜仲、巴戟，飲完成身㷫烚烚，有強身健體效用，夠薑嘅，連湯渣都食埋落肚喇。
3.醬爆牛荔枝$78
洗亁淨牛荔枝，用芫荽梗、蒜片、指天椒、洋葱一同炒，梁師傅︰「鑊氣夠，醬爆煮法最惹味。」雖然煮熟後嘅賣相靚仔咗十倍，不過我過唔到自己嗰關，打死唔試。
4.牛荔枝$58
4.牛荔枝$58
切片火鍋料，賣相幾難睇㗎，不過黃生話︰「好爽口，試吓啦。」味道跟雞子差不多，只不過牛荔枝體積太大，要切片食。
5.橋底辣蟹 每隻$150起
鎮店之寶，每日可以賣約150隻。越南肉蟹用瑤柱加葱段炒，最後加上炸蒜，入口蟹肉有一陣香濃瑤柱味。
食客有Say
搵食攻略
橋底辣蟹（28931289）
地址︰灣仔駱克道405-419號華發大廈C舖
營業時間︰5:00pm-6:00am
座位︰約80位
交通︰銅鑼灣地鐵站C出口，行至鵝頸橋過對面馬路直達