遊戲展覽：日本幕張搶先直擊<br>SONY緊急宣布　PS3降至$3,342搶客

遊戲展覽：日本幕張搶先直擊
SONY緊急宣布　PS3降至$3,342搶客

今年年尾，兩大新世代主機正式對決，任天堂Wii同SONYPS3推出日期貼近，戰情絕對係一觸即發！噚日東京遊戲展2006正式開幕，喺任天堂缺席底下，加上XB360氣勢疲弱，SONY誓要把握「獨大」機會，力搶全球傳媒同機迷目光，唔單止將PS3王牌悉數盡出，仲喺開幕時緊急宣布20GB版PS3降價兼全線加入HDMI！
記者、攝影：陳國輝

全球嫌PS3賣得太貴，SCE就喺東京遊戲展（TGS）剛開幕時發表，20GB硬碟版本PS3正式宣布降價至49,980日圓（約港幣$3,342），比原先公布差唔多降低近萬日圓！而且更加入本已抽起嘅HDMI輸出，令平價版PS3都具有播放1080p高清畫質嘅能力，實在係SONYFans嘅一大強心針！可惜現場並未公布較高階嘅60GB版有冇改變。

■現場擺放約百部PS3實機供試玩，比5月嘅E3展齋播片更勁。

約百部PS3試玩

一如過往，東京遊戲展仍在日本千葉縣海濱幕張舉行，喺四大展館入面，SONY及微軟分別各據一方，但論到矚目程度，肯定非SONY場館莫屬。開幕致辭一完，全球傳媒明顯衝向Hall6嘅SONY展館度，個個爭住力試Final版PS3，以及試玩《GTHD》、《DevilMayCry4》、《VirtuaFighter5》等大作。

■SCE社長及CEO久多良木健

■PS3展示台引嚟唔少傳媒駐足凝望，從相片中感覺機身頗巨。

■輕輕傾斜手掣，PS3已感應到兼作出反應，相當靈敏。

■PS3操控介面冇更新，可能最後一刻，SONY會加入新功能。

體感手掣靈敏度高

臨近11月11日正式發售，喺TGS入面嘅PS3可算已屬最後版本，理應唔會再改變。現場所見，暫時只得無線手掣、視像鏡頭兩款周邊配件，記憶卡、軚盤、滑鼠同鍵盤等一一欠奉。最具爭議性嘅手掣，正式名為SIXAXIS（放心，已註冊專利），除以無線連接外，亦可USB接駁，將來還會追加其他USB手掣㖭！小記就試玩咗隻利用水平感應裝置嘅遊戲《flOw》，玩家要控制飛龍食晒天空上嘅寶物先可以過關；當將手掣上下左右搖擺控制嗰陣，原來唔使做好大動作已經感應到，相當之靈敏！可惜今次Blu-ray仍未有試碟，而且官方亦冇將PS3操控介面公開，想感受超靚嘅畫面，只能夠喺遊戲上體驗了！

■手掣正面外形，以及每粒鍵嘅設計，都同之前所發表嘅一樣。

高清賽車之戰
《GTHD》真實取勝

嚴格嚟講，《GTHD》唔算新作，只係將《GT4》高清化，暫未見新加賽車及賽道。不過現場試玩氣氛熱鬧到爆晒燈，首先最多人排隊試玩嘅八人連線賽車機座，有晒軚盤同賽車椅，襯埋個車架同大電視，真係臨場感十足！試玩過後，發覺畫面提升至1080p全HD（60fps），仍然流暢爽快，好多舊有賽道如東京246等建築物，都明顯更為細緻，未知是否重製部份場景關係。至於連線對戰則由六人增加至八人，就算幾部機全高清開動，仍然充滿速度感，希望實際推出嘅Online版不會遜色太多啦！

■用勁靚法拉利紅色軟座椅，High到爆！

■雖然有成八部機座試玩，但都要排成30分鐘隊先有得玩。

■揀車畫面唔同咗，暫未見有更新嘅車款。

vs《RidgeRacer7》靚車靚景

另一邊廂，BandaiNamco嘅《RidgeRacer7》雖然冇賽車座咁有氣勢，不過排隊等玩嘅人龍亦不弱，每部機經常有二、三十人排隊等玩。《RidgeRacer7》一向以靚車靚景為號召，新作仲係跟PS3同日發售，叻過《GTHD》好多！今次《RR7》算係首次公開試玩，場景畫面的確靚到無話可說，兩邊樹林同地上樹蔭做得好真實；操控感一如過往以爽快為主，甩尾技巧再次大派用場！可惜新作最大突破嘅改車換外形系統，喺現場仍未有得玩，只好繼續喪甩尾片彎。

■睇吓遊戲中嘅車，多邊形及光源效果做得超靚，高清果然不同凡響！

■加入新車系列，以3D模型更係史上最多嘅數量，難怪圓角都做得咁細緻。

視像鏡頭化身《審判之眼》

PS3繼續大玩PS2已熱賣嘅EyeToy系統，呢款被譽為最有創意嘅卡牌Game，由公布畫面到玩法開始，一路引起唔少話題。小記喺E3度已試玩過，今次再玩「TGS版」，雖然感覺上畫面分別不大，不過遊戲棋盤到選擇怪物，都增加不少。最特別係小記好明顯感覺到，視像鏡頭同遊戲之間嘅互動性有進步，例如玩家凌空舉起手掌，鏡頭便捕捉到兼擺隻怪物喺你手上，好真實！

■九個格入面鬥快霸地盤，大大細細怪物爭位企相當之搞笑。

■最後版本嘅棋盤及PS3專用嘅視像鏡頭終於曝光。

■好多人仍未摸熟遊戲玩法，不過仍玩得不亦樂乎。

■「怪物設計得好有心思，尤其鍾意大大隻有霸氣嗰款。」

兩大動作Game續篇

喺PS3已經公布嘅50多款遊戲中，大作如《RidgeRacer7》、《DevilMayCry4》、《VirtuaFighter5》、《全民高爾夫5》、《F1Championship》等都有實機試玩，不過數量僅約20多款，都未算好齊，就連小記最鍾意嘅《MetalGearSolid4》同《FFXIII》均只得播片吊住癮！

《DevilMayCry4》

惡魔第四次喊喇！作為CAPCOM首款殺入PS3嘅大作，當然出盡全力，畫面細緻亮麗已屬指定動作。現場試玩版完成度好高，雖然只得短短數分鐘試玩，不過見到場景設計得好複雜兼好立體，主角招式更係誇張華麗得多，必玩！

■雙槍搭大劍，已係主角招牌武器，試玩版已加入多款新招式。

《VirtuaFighter5》

XB360開賣有《生死格鬥》撐場，PS3都唔輸蝕，搵嚟世嘉王牌《VirtuaFighter5》對撼！呢款最強格鬥遊戲喺日本街機高踞頭三甲位置，移植到PS3後表現毫不輸蝕，角色豐富多變嘅格鬥技全部重現，又一隻必買之作。

■現場提供埋將同步推出嘅《VF5》專用大手掣，好鬼重㗎！

■《VF5》在日本屬第一位3D格鬥Game，喺TGS自然多人爭玩。

■呢幕鐵籠困獸鬥真係表現到PS3機能，四邊鐵絲網同場外觀眾均做得極度逼真。

其他矚目大作

《全民高爾夫》系列熱爆PS2同PSP，嚟到PS3版最令人印象深刻係廣闊嘅草地好靚，障礙物等細微布置都好精細。

■世嘉高球Game風格真實，球桿、風向等Pro得驚人。

■玩飛車再喪炒嘅Game，着重速度同跨越障礙嘅技巧。

■SCE開發，主角揸大刀周圍劈，儲滿魔力仲有超必㖭。

■估唔到居然跟PS3同步發售，高達迷拎定錢喇！

街機勁搶錢，Online麻雀Game透過PS3網絡，可跟全日本雀王雀后比拼，再力爭網上排名。

PS3規格有幾巴閉？

‧Cell處理器：PowerPC為基礎（3.2GHz）、7個同以3.2GHz運作之協調處理器（SPEs）、512KBL2高速快取、218GFLOPS浮點運算
‧圖像處理器RSX：時脈速度550MHz、1.8TFLOPS浮點運算能力
‧記憶體：主256MB另加圖像256MB
‧網絡：10-1,000BASE-T寬頻、Wi-Fi（b及g）、藍芽2.0
‧光碟：支援Blu-ray光碟（50GB）、DVD及SACD
‧其他：2組HDMI輸出（1080p）、兼容舊有PS、PS2遊戲
＊以上為暫定規格。

■求其試咗PS3無線傳Game畀PSP，冇進一步示範兩機連動性。

■臨近11月11日發售，連PS3包裝盒都曝光埋，一句講晒，肉酸！

機迷點睇？

崇：怕買唔到
PS3外形好靚好Cyber，手掣就冇乜特別。雖然賣平咗，不過今年都好難撲到貨囉！

青木：擰住玩
擰吓隻手就玩到Game，好好玩！不過隻Game幾難玩，我打機反應又唔好，玩得好差！

Sean：畫面好靚
畫面的確好靚，尤其試賽車Game時感受最深，估唔到《GT4》可以變到咁靚。

明日預告：兩大對手動向

本以為任天堂唔參加TGS，收起晒Wii嘅新消息唔公布住，點知世嘉失驚無神喺場內擺咗部Wii畀人試玩新嘅棒球Game！另外XB360喺硬件上冇聲氣，不過兩款日式大作爭回唔少機迷目光，想知佢隻《藍龍》好唔好玩？留意聽日本版介紹！