由卿姐一手湊大嘅前綫，唔經唔覺已經10歲大。前綫噚晚係沙田明星畫舫舉辦10周年晚宴，筵開40席，召集人卿姐盛裝亮相，只見佢一襲黑色seethrough裙，雖然只係透視手臂咁大把，但都令人嘩嘩聲。
卿姐江湖地位高，所以噚日就算有幾個酒會同公民黨搶客，都有唔少高官捧場，包括孫公、冬冬同林D9，黃仁龍趕兩場都到。退咗休嘅媽打、黃毓民以及梁耀忠都有去。卿姐同八方講，開心到不得了，真係要多謝大家。切完蛋糕，食完飯，卿姐仲同啲嘉賓以及街坊唱歌跳舞，到11點都未停。
呢排啲政客全部肥晒，因為酒會多到暈，場場食少少，都無啦啦多幾磅。好似煲呔咁，噚日一連走四場。可唔可以選擇性去呢？應該唔得，順得哥情失嫂意係其次，少一張選票就弊。