今日，孫柏文會幫大家盡量揭穿，Amaranth對沖基金因炒燶天然氣執笠之謎。呢個絕對係今期全球金融界熱門話題，大家如果有番鬼佬朋友喺倫敦啲對沖基金做嘢，而又係我隻金手指嘅fan屎，不妨用今日呢篇文章去解釋畀佢知發生乜事。
不過，首先我要講畀大家知，喺咁多種投資裏面，其中一樣最賺錢嘅，就係去買人哋因為冇錢而需要賣嘅「跳樓貨」。今次Amaranth執笠，佢啲貨應該好抵買，而噚日《華爾街日報》話，真係有人去買，你哋話邊個咁勁？（答案喺文章尾部）
Amaranth俾人睇死
情況好似我幾年前去葡京玩，走到去玩廿一點嗰度，見到有位印堂發黑嘅朋友，好似將佢自己僅有最後嘅兩千大元押落去。點知莊家一派牌，就派咗兩隻A屎畀佢，呢位仁兄又冇錢分牌，左毅毅、右拜拜，我就好似「行俠仗義」咁，用兩千大元買落佢其中一手A屎牌，最後我同佢都廿一點。所以執Amaranth平貨應該會幾好搵。
其實，今次Amaranth執笠，只不過係一次典型大戶對壘「拗手瓜失敗」嘅例子。Amaranth睇天然氣價升，對家睇天然氣價跌，孫柏文相信，兩面都冇心將天然氣貨做交收。有人大手、大手咁賣天然氣嘅金融衍生產品，Amaranth就接啲衍生產品，不過，因為天然氣一個好簡單嘅特徵，Amaranth就輸大錢。
試問大家，如果你係Amaranth級嘅大戶，有差唔多無窮無盡嘅信用額，你又睇好一隻股票升，開始買。對面又有人瘋狂地賣畀你，只要你計得準，知道已經冇貨，到最後差唔多交收日，佢又知冇貨交，你就可以以高價賣番啲貨畀佢，從中取得暴利。就算佢有貨做交收，你都可以接貨擺喺貨倉，等價錢升番先至賣出去。
JPMorgan嫌疑大
Amaranth嘅問題就係，天然氣係一樣非常之難儲存嘅嘢。股票好易存，實貨黃金、白銀只需要一個夾萬，石油都係要幾個桶，不過，實貨天然氣就需要專門嘅儲存設施。睇天然氣價跌嘅人，就係知道北美洲儲存天然氣設施嘅空位所餘無幾，知道就算Amaranth有無窮無盡嘅信用額，到交收日都冇可能接貨，知道Amaranth手頭上買天然氣升嘅衍生產品，無法變成實貨，所以就可以好大膽咁賣天然氣衍生產品畀Amaranth，因為知道Amaranth要喺交收日之前賣晒啲衍生產品。
咁，究竟係邊個賣天然氣衍生產品畀Amaranth？孫柏文唔知。不過，以下我為大家提供兩個事實，第一就係JPMorgan係全世界最多衍生產品嘅機構，淨係06年第一季，佢哋就多咗5.5萬億美元，無錯係「萬億」trillion。第二，有人話JPMorgan係喺05年年尾，先至開始參與天然氣及其衍生產品買賣。我為大家喺以下嘅圖表，記低JPMorgan開始參與天然氣買賣之前、之後嘅天然氣價走勢。
最後，要解答問題。究竟邊個執Amaranth嘅平貨？一個叫做Citadel嘅對沖基金，同埋JPMorgan。
孫柏文