許冠文娶新抱，大排筵席，左丁山與劉天賜、黃毓民同席，聽毓民講，原來佢已經組黨，叫做「社會民主連線」（LeagueofSocialDemocrats），簡稱「社民連線」，開宗明義，搞社會主義民主。世界上啲社民黨，最成功嘅模式就係北歐國家，其中又以瑞典最廣為人知。瑞典大選，過往七十四年當權六十五年嘅社民黨受到最大挑戰，選前與反對派嘅民望叮噹馬頭，最後竟然輸咗下台成為在野黨。社民黨在英國不成氣候，主要係因為高稅政策嚇怕人，毓民話要在香港爭取民主，好多人贊成，搞埋北歐式社會福利，冇GST就跛咗一隻腳，唔加稅就會用清財政儲備，香港人是否贊成，左丁山唔敢樂觀。
「社民連線」喺十月一日（贈興乎？）喺旺角麥花臣球場舉行大會，主要成員有毓民、長毛、陳偉業與陶君行，屆時全部出席人士穿紅色T恤，上有甘迺廸、曼德拉、馬丁路德金、甘地嘅肖像，毓民話穿紅衣，並非仿效施明德，佢話：「紅色代表陽光、熱情、樂觀、正義！曼德拉、金博士、甘地係和平非暴力爭取自由人權平等嘅典範。」佢冇講甘迺廸，呢位美國總統代表乜呢？佢喺一九六○年當選，正係毓民少年時代，訂立目標送太空人上月球，可能係代表理想，夢想之追求啩。
毓民話搞政黨，最麻煩係冇錢，籌款困難，暫時佢搵到一位廠商贈送四千件紅色T恤，鄭大班（議員）贈送約一千枝紅玫瑰，送畀參加十月一日大會嘅女士。既然咁快造勢，相信毓民有意思參加○八年立法會選舉啩，佢去邊個區參選呢？九龍東有鄭大班，假如鄭議員退出，會支持番陶君行；新界東有長毛，新界西有陳偉業等同路人，唔通去九龍西挑戰曾鈺成、涂謹申、劉千石？又或者去到港島區砌蔡素玉，嗰度又有何秀蘭想重返立法會喎？想落佢有何處容身之歎。咦，如果○八年有劉健儀、葉劉淑儀兩位女將加入直選，毓民爭埋一份，○八年立法會議席之爭，好刺激。