啱啱過去禮拜三，英國寒風勁吹，不過小弟上次提及，推介大家只買一注利物浦「主勝」，有2.55倍，總算沒有令大家失望，今天想續談讓球盤長追強隊冇失拖理論。
良機至紅軍波盤齊贏
其實強隊長追理論，先決條件是只計聯賽盤路，原因是周中踢國內盃仔，無論任何頂級聯賽球隊，踢來都漫不驚心（除非去到季中領隊們睇怕一事無成，需要爭盃仔以向大老細交代則另計）；大家若然有心半夜三更臨場上網睇陣，見到米堡、富咸及曼城出場班球員唔差，依然輸畀低組別球隊出局，證明投注這類賽事風險極大，小注怡情博懵當然無妨，但不值重插大熱W過關，波友這點要緊記。
利物浦上場輸埋畀車仔後，已錄得近4場聯賽亞洲盤全輸，這類班霸有這樣嘅盤路，實在差得不合理；已變成如8月份嘅巴甲哥連泰斯一樣，成筆者重點留意投注嘅銀行球隊，更結合兩大有利條件，已值得博一注「主勝」。首先對車仔運氣好一點已起碼和波，受讓半/一只輸半格在盤路上已呈準備起飛之勢；另外周中對手紐卡素有兩大不利條件，第一是已連續3場作客比賽，戰力勢必下降，最正係英超其中一位最穩健門神基雲倦勤，客軍由生銹嘅夏柏補上，實在天賜良機，如果唔係佢老哥把關，相信沙比阿朗素未必有勇氣70碼射球入網，到時波友只能收回1.55倍單W。
荷甲暫勿博「大」
好嘞，馬後炮一輪，今期再由小弟主打，貼士請參考頭條；但我要提大家，有一個自己很喜歡投注嘅「上盤加大」聯賽─荷甲，今屆初出現反常盤路；荷甲聯4強未見霸氣，歸根究柢，主要是陣容變動大，連希斯寧基呢類二、三流球員都被蘇超些路廸挖角，又難怪冇晒射手嘅飛燕諾開季4戰只得4分，波友對荷甲4強，暫是應持觀望態度，勿博咁「大」波膽。
文：蘋果波神