應采兒在電影《情意拳拳》中，為愛郎苦學猜枚、硬啃數以升計啤酒。現實中，應采兒同樣重視愛情，渴望完美婚姻，她很認同栢芝追求真愛的態度，更希望像對方一樣敢愛敢恨，30歲前結婚當媽媽。
應采兒在《情意拳拳》中飾演原本不懂猜拳的清純女孩，但為了贏回男友安志杰，專誠向枚神黃子華拜師。由於大部份時間在煙霧瀰漫的酒吧拍攝，令應采兒狂吸二手煙，引致鼻敏感，日前她說：「除咗吸二手煙，劇情講我要猜枚，每日晨早起身埋位拍戲就要飲啤酒，好有鬼佬feel。」
30歲前做媽咪
對於現年26歲的師姐張栢芝和謝霆鋒復合後，不理公司勸戒和老闆娘向太陳嵐的反對，只顧拍拖，荒廢事業，應采兒卻認為栢芝的事業已略有成就，故她頗認同栢芝的愛情態度，她說：「我同佢唔同，除咗事業發展唔同外，我哋嘅年紀都唔同，可能到佢個年紀，都鍾意結婚生仔。我嘅目標係有個幸福家庭，寧願搵少啲錢。我仲有7年先至30歲，不過都想盡量喺30歲前做媽咪。」
應采兒又指向太像媽咪一樣，她說：「佢好希望你努力做嘢，佢知唔知你拍拖？梗係知！不過佢唔會叫你唔好拍拖同結婚。」
與孫耀威傳緋聞的應采兒謂現時未計劃結婚，首要目標是積極搵錢，她說：「計劃幾耐都冇用，結婚其中一部份係衝動，好講timing。」她又認為不可以太依賴一個男人，因為風險很大，她說：「女仔其實好現實，自己有錢會有多啲安全感，兩個人一齊就算係幾耐都會分開，女仔有啲錢，起碼有個保障。」
採訪：張俊銘
攝影：仇志德
場地提供：Au'sKingdom
髮型：D.Y.（HairCulture）
化妝：SynniTam
