「蘋果愛心月餅2006」活動現正展開，名古屋麵包西餅有限公司率先送出100個單黃白蓮蓉月餅，日前安排送到聖基道兒童院，讓居於該院的孤兒或來自破碎家庭的兒童、接受新移民適應服務的孩子，以及參加課餘託管服務的低收入或綜援家庭的小童，得到這批愛心月餅迎接中秋。
剛過去的9月11日，「蘋果愛心月餅2006」首次舉行大型贈餅活動，記者將100個由名古屋麵包西餅有限公司捐出的月餅，送到位於沙田的聖基道兒童院新移民中心，多位來港不久的小學生接過月餅後，都表現得既開心又興奮，現場氣氛溫馨感人。
10歲的東憶，是其中一個受惠孩子。她說：「我好鍾意中秋節同食月餅，所以收到呢個月餅特別開心，以前都係食啲有蛋黃嘅傳統月餅，嚟到香港後就好想試吓食冰皮月餅，因為媽咪話呢種月餅好好味，但我就未曾試過，因為佢太貴，冇錢買！」
新來港兒童懷念故鄉
在香港狹窄的生活環境與兩地課程內容的差距，都是這些孩子最急待適應的地方。東憶一臉懷念說：「喺鄉下間屋有三層高，周圍又多空地，我自己間房都大過𠵱家香港屋企。以前過中秋好開心，我哋都唔會玩燈籠，而係放煙花，燒炮仗，比呢度熱鬧好多。」
成長背景的迥異，讓眼前孩子對舊日中秋念念不忘外。東憶說：「嚟到香港，最難係英文，因為深好多，學得好辛苦，加上呢度地方細，唔可以好似以前咁，一大班同學返屋企，齊齊做功課，唔識就一齊研究，學習氣氛會更好。不過，大陸嘅數學同普通話程度就高過香港好多，嚟咗呢度一年，就考過兩次數學滿分，好多土生土長嘅同學都會嚟問我。」
低收入難購過節美食
尚有二兄一姊在學的嘉欣，一家生活全靠父母任清潔工來支撐。13歲的她說：「月餅愈多鹹蛋黃愈好味，所以四黃月餅我最鍾意食，夠晒油香，一個中秋節可以食成盒。怕肥？唔驚，我咁細個又咁鍾意玩，唔會肥嘅！不過嚟香港之後，媽咪成日都要返工，冇時間帶埋我一齊買月餅過中秋！」
這群來港不足一年的小學生，不少來自低收入或領取綜援的家庭，有的參加來港適應班，有的接受課餘託管服務。而動輒過百元的月餅，對這些孩子並非必然的過節美食。或許是這個原因，加上對香港的新生活仍帶點陌生，所以偶爾收到外界送來的物資，例如今次的愛心月餅或過去的文具及玩具時，他們臉上都流露出高興珍重的表情。