美國聯儲局開會之後決定唔加息，雖然大家都預咗，但係美股仍然有反應，道指仲升破咗11600，睇埋納指同標指嘅走勢，昨晚應該繼續升。
預咗嘅好消息確認咗都要炒上去，原因只得一個，就係要炒個市上去，去到邊個位唔知，但美股推高，對港股有好冇壞，恒指昨日又升107點，成交仲增加到371億元，揸住師傅嘅秘訣「成交走喺大市前面」，恒指仲要推上去。
個市係咁升，啲炒家仲係追住啲國企股同埋啲窩輪嚟炒，睇怕呢個局面仍然唔會改變。招行（3968）今日掛牌，招股反應熱烈，其他國內銀行股都可以留意。
交行C輪4992：唔等隻招行掛牌，隻交行（3328）已經急不及待炒上，又破橫行區，又創新高，單日成交增加至11.6億元，肯定係基金盤掃貨，點解掃得咁勁？隻股橫行咗咁耐，破位梗多人追，但要諗下橫行咁耐邊啲人買？諗到呢度，應該知道乜嘢人掃隻股上去。
𠵱家上咗市嘅國內銀行股邊隻最好？見仁見智。不過，若果講質素、交投及股價上升嘅空間，當然係交行，咁大力破咗位，起碼都要試下6元關附近啲位。
隻C輪4992前日升凸咗，昨日升少咗，扯平，昨收65仙，今年12月中到期，溢價1.3%，槓桿率8.3倍（有效7.4倍），引伸波幅21.6%，對沖值0.895，正股升上5.80元，4992應該見到1元，正股試6元關，隻輪唔會平過1.20元，呢個價買，正股跌穿5.20元止蝕。
俊樺