呢排抽新股成為全城焦點，日前仲話搞出人命㖭，唔知係咪咁，有啲抽唔到股份嘅投資者，索性將啲資金用嚟買樓，美聯高級區域經理梁文輝報料，一名入票認購招行嘅投資者，因為中唔到籤，所以將筆資金用嚟買樓。
個投資者買入嘅係鴨脷洲海怡半島7座A室，面積927方呎，3套房間隔，成交價400萬，呎價4315蚊。仲係即睇即入市㖭。個單位月租可達1.6萬，計落回報有4.8厘。
不過，梁文輝話唔知個投資者用咗幾多錢去認購招行。蘭西心諗，買樓𠵱家可以造到九成半按揭，只要畀半成首期就掂；若果係咁，個投資者抽招行嘅金額只係20萬，若果畀三成首期，都係120萬。
梁文輝補充，呢個只係個別例子；即係大家唔好諗住有好多投資者會將筆資金轉投樓市，睇怕最快都要等新股認購潮完咗至有希望，因為𠵱家中到新股，上市首日分分鐘大升四五成，好過炒樓多多聲。
電郵地址：[email protected]