國泰航空今年認真喜事重重，除咗買起港龍航空外，華華聽聞，多年來爭取復飛嘅上海客運線，愈來愈有眉目，暫定12月初啓航，每日一班往來航班，晚上7點喺香港飛上去，10點飛返落嚟。
夾埋港龍𠵱家每日有16班機飛上海，國泰、港龍計埋，每隔幾十分鐘就有一班，真係好頻密。問題只係，唔知上海機場同空中交通頂唔頂得順，若然配合唔到，搞到誤點或者要無故取消航班，咁就唔多好啦，乘客最怕方便變成不便。
都係講番啲好嘢，國泰今日傍晚喺沙田馬場慶祝六十大壽（正日係星期日），邀得特首曾蔭權做主禮嘉賓。一班股民亦以真金白銀賀國泰大壽，睇住最近油價下跌，不停買入國泰股份，刺激股價連升8個交易日，噚日收報16.14元，再升1%，創兩年半新高。
至於國泰點解揀喺馬會做大壽，華華估計，應該同國泰行政總裁陳南祿最近當選馬會董事有些少關係。聽講，國泰今晚亦會有啲喜事宣布，同場當然又會加演歷年空中服務員嘅制服貓步啦，襯番個主題嘛。