公戲私用：《龍虎門》電影版　王小龍鬥火雲邪神

呢兩日碟場返咗套《龍虎門》DVD，有碟舖老闆透露銷情理想，單係平裝版，一日賣出至少50隻。仲話唔少男Fans因為甄子丹喺《殺破狼》喪打嘅演出，對配合漫畫招式嘅《龍虎門》滿心期待。雖然電影上畫時，唔少漫畫迷大彈毫無昔日漫畫感覺，但鍾意睇武打場面嘅朋友一於少理，最緊要拳拳到肉，打得精采。
記者︰陸俊雄

限定版送三皇頭像

今次《龍虎門》DVD認真多搞作，分3個包裝任君選購，包括齋碟嘅平裝版、送三皇紋身印水紙嘅珍藏版，及有印水紙、限定編號影卡、一套三個彩繪頭像嘅限定版禮盒，仲係全球限量2,000套。《龍虎門》話晒都係香港土炮經典，陪住唔少人成長，想收藏龍虎三皇頭像嘅Fans，呢次真係有買趁手。
平裝版︰$105
珍藏版︰$105
限定版︰$234

■平裝版內Bonus片段同套戲分兩隻碟。

■限定版有龍虎三皇頭像送埋，有碟舖老闆話早已有Fans訂購。

其實《龍虎門》漫畫講咩？老套講句︰「一匹布咁長！」最緊要宗旨係「拳頭解決，正義長存」，而電影同樣忠於呢點。即使有人話電影版係將原本漫畫入面早就瓜柴嘅王小龍，無限放大。但不得不同意，飾演小龍兼動作導演嘅甄子丹，喺動作設計上落足心機，亦令《龍虎門》跳出《風雲》不斷擺姿勢無實際嘅框框。

■就算小虎同石黑龍開頭好似好勁，面對火雲邪神全無招架之力。

■羅剎女係電影新加角色，同王小龍有段感情線。

■石黑龍講自己面上條疤都講咗幾次。

必睇Bonus

睇完套戲打得咁激，當然想知道佢哋係點拍出嚟。喺平裝版DVD內會另外有隻光碟，特別收錄咗拍攝前後嘅片段，當中包括前期製作特輯、演員訪問、靚相集等。喺製作特輯入面，會見到甄子丹教余文樂同謝霆鋒，點樣先會打得好睇。余謝兩人Fans見到偶像被導演吊住飛來飛去，再撞牆撞櫃，睇見一定心痛。另外「龍談虎笑」入面，訪問番導演同主要演員喺拍攝時嘅辛酸史。如戲入面多番情挑王小龍嘅羅剎女，戲外到底咩模樣，對於戲中自己嘅大膽對白，佢又點睇？你都可以搵到答案。