早前林海峰（阿Jan）一口氣以13個造型拍攝電話網絡商新廣告，每個造型均十分搞笑，惟獨穿上整齊西裝扮主播時則一臉嚴肅。身為創作人，阿Jan鬼主意多多，但他卻表示無意參與新廣告度橋諗計，還笑說：「攞苦嚟辛咩？」
林海峰最近為電訊盈科拍攝新一輯廣告，宣傳手機可以隨時收看多個寬頻電視台頻道。廣告中，阿Jan分別以13個不同造型亮相，包括攝影師、日本武士及朗拿甸奴look的足球員等。
舒舒服服等埋位
出名扮嘢功夫了得的阿Jan表示，最滿意是新聞報道員的造型，他說：「有制服誘惑嘛！我好少着西裝，嗰個look好正經，又好莊重，同我平時做節目或者做表演嘅形式都好唔同，而且細個都會喺屋企扮武士啦！」
阿Jan雖然從事創作，卻沒有打算親自執導拍廣告，他說：「攞苦嚟辛咩？我都想自在啲，唔想有自唔在。𠵱家都幾好，有人安排晒所有嘢畀自己，幾舒服吖！叫我去換衫就換衫，叫我埋位就埋位，有啲嘢畀其他人做啦！」
新廣告宣傳可以透過手機欣賞電視節目，問阿Jan會選擇收看哪類型節目？他的答案是新聞報道。阿Jan說：「平時返到屋企都好少睇電視，因為啲細路仔要做功課。如果搭長途車咪睇吓囉，又或者午飯時間喺公司都可以睇吓，方便得多嘅。」不過阿Jan卻不打算為女兒買一部手機，他說：「唔會喇！我諗會畀一個打唔出嘅電話畀佢好啲，佢好鍾意咬啲角落頭，都係唔好喇！」
採訪：王連連
攝影：仇志德
