唔知大家有無同樣經驗，成日收到朋友E貓過嚟嘅短片，除笑笑小電影外（四仔唔計），大部份係外國廣告，絕少係本地製作。大家梗話︰「要睇香港廣告，開電視機咪有囉！」無錯，如此方便，可惜同朋友閒聊間，寧講外國貨都唔提土產兩句，咁就有問題。
上一個引起全城熱話嘅廣告係邊個？問唔少網友話，係三色台喺世盃期間嘅「阿叔講波無壓力」。新球季都開始咗啦！乜近來香港真係咁悶蛋？有眼見，惟有盼做廣告嗰位，大膽創新少少。有同感嘅話，有好嘢介紹畀你，外國有個叫AdForum.com的網站，每星期會選出TOP5，近期就有美國iPodNano新廣告，主題係「Colors」，當部Nano油掃咁舞。其實除咗TOP5外，仲有是日最佳等，大把古靈精怪外國廣告等住你睇。香港學生甚至香港人，成日俾人話創作力唔夠，得閒睇吓人哋傑作，當幫自己補充養份都唔錯。
記者︰陸俊雄
網址： http://www.adforum.com