本世紀最富娛樂性嘅8號仔賣枱刁，搞咗幾個月都未得，好話唔好聽，拖到連賣盤嗰位李二少都悶埋，咁因乜拖咁耐未解決？無他，原來係獅城交易所「做嘢」，先係前日「迫」買家誠實小番薯，爆邊個科水畀佢落五億元定（個答案亦係眾望所歸──二少阿爹超人），仲講明第日超人若果再科水，就唔畀二少投票（即係要單刁喎）...絕對係向買賣各方、幕後買家同埋成個香港特區政府嚟一個「強政勵治」嘅完美示範！
咁坡佬出招後，𠵱家最騰係邊個？唔係同阿爹無偈傾嘅二少，亦唔係成日管唔到個仔嘅超人，更加唔係從不喜歡發誓嘅誠實小番薯，而係最鍾意祈禱、吹口哨、餵錦鯉兼諗住自己可以冧莊嘅煲呔，無他，響呢個爭取連任嘅緊張關口，佢至驚俾人搵到位話佢官商勾結囉！
點解咁講？二少個賣盤遊戲玩咗咁耐，除咗響初段時間，見到人頭馬司長好正氣咁叫證監查吓之外，之後可謂冇晒下文，咁文浩仔管嘅電訊單位，又基於事後規管呢條購併條例而唔到佢管，由於誠實小番薯唔使爆自己條水喉出嚟，所以證監又做唔到嘢，就算連上個月初立法會定咗日子開會「研究」單刁，最後都因為傾截聽條例而取消咗。𠵱家睇嚟，好似煲呔為首嘅官府，無厘頭選擇性實施「積極不干預」囉！
最新發展係點？成個香港突然間好多noise，叫煲呔秉公辦理，希望睇吓煲呔會唔會好似坡佬咁有power，二少最後係咪賣得成，大家已經唔係好理。如果華華係煲呔，呢排一定祈多啲禱，望二少賣唔成，因為如果最後乜事都冇發生過，二少繼續響8號仔做莊，咁大家咪一齊當粉筆字抹咗佢囉，仲點會有咩官商勾結呢！
李華華
[email protected]