他信（Thaksin）一出國就失業，連泰國總理都冇得做，曼谷街頭滿是軍人同坦克，香港人一定驚餐死，但係同泰國淵源甚深嘅立法會議員陳智思就冇有怕，佢話呢啲場面喺泰國見慣不怪，啲軍人得到泰王蒲眉蓬嘅認可，全國上下都唔會有異議，直情係大團圓結局，人人都好開心。
陳智思仲話，睇吓個市就知冇事啦，停咗一日，開番就馬上升，佢想入貨都嚟唔切。聽Bernard咁講，又好似好小事，不過，佢都話，問題未完全解決，因為一旦法庭判咗泰愛泰黨同民主黨違規，要兩大黨解散，咁就好麻煩，而更深遠，係假如泰王太老要傳位，唔知再有冇人可以壓得住場。
叫陳智思比較吓阿扁同他信，佢話兩人都係民選出嚟，都係大比數勝出，同埋連任成功，但係相對而言，阿扁貪得實在小巫見大巫。如果他信唔係咁大貪同貪得咁出面，佢其實都係一個唔錯嘅總理，為泰國做咗啲好事。