食日本菜，侍應一般會着和服，主打新潮日本菜嘅「Miso」，侍應唔只着和服咁簡單，仲特登搵設計師搞搞新意思，喺日式和服基礎下作出變化，將餐廳嘅蝴蝶主題融入制服中。Mango做Reception，着嘅制服係和式淺藍色上衫加一條闊闊黑褲，整體望落去有啲似古代日本武士，佢話︰「客人嚟到舖頭第一個就見到我，都有客人讚我套制服靚㗎。」
招呼客人嘅侍應都着得好Smart，同樣係和式上衣加黑長褲，襯黑色平底波鞋，成個Look就更醒目。問盧仔件衫咁靚怕唔怕整污糟，佢話︰「唔怕，一污糟就拎去換，有好多士啤衫。」唔單止樓面，一班喺壽司吧前工作嘅師傅都有靚靚制服着，阿政話︰「件衫靚，做起嘢上嚟唔會阻住工作，美觀同Function兼備。」
冷咖喱牛肉烏冬$88
咖喱牛肉加手打稻亭烏冬、炸蒜、金菇，伴冷咖喱汁食，味道微酸帶甜，烏冬口感煙韌。
脆皮壽司卷$65
芒果、蟹肉、牛油果用腐皮包好後上粉漿炸，淋上Wasabi同蒜茸做嘅沙律醬，唔使點豉油食。
彩虹卷$180
壽司鋪上帶子、三文魚、油甘魚、吞拿魚等五顏六色新鮮刺身，做成七色彩虹視覺效果，啖啖食到唔同魚類，正斗。
Miso（21750638）
地址：尖沙嘴海港城港威商場地下G301店