《長信不如短訊》，去年由林夕填詞的流行曲，道出時下青少年愛用手機短訊服務SMS（ShortMessageService）的心態。電訊管理局最新數字顯示，SMS數字極速增加，港人狂打SMS，每月平均發出2億個短訊，今年上半年全港手提電話用戶總共發出逾14億個短訊，數量正以每月5%速度增長，預期全年總數將超過30億！ 記者：林浚川
「我都唔算多，我身邊啲朋友仲多呀，同佢哋出街佢哋部機不停咁響，要不停咁覆SMS。」今年17歲的Holly暑假期間，每個月平均發出1,500個SMS，最高紀錄一個月2,000個，她說她在朋友當中只是「小兒科」，比她瘋狂的比比皆是。
4張卡狂打 月花過千元
電訊管理局資料顯示，截至今年六月，全港共有891萬多個手機用戶，單是6月港人便發出逾2.2億個短訊。愛SMS的Holly每日必隨身攜帶四張分屬不同服務商的手機儲值卡，以便與不同網絡的朋友玩SMS，因為跨網SMS服務要收費，購備不同網絡商電話卡可以節省金錢，「試過有個月打得太多SMS，搞到張單過千蚊，俾阿媽鬧死。」
除了付出金錢，狂打SMS更可能導致嚴重後遺症，英國剛公布的調查指一成六人有「手機焦慮症」，患者經常感到煩躁和焦慮；本年6月澳洲一項行為學研究更指出，沒有收到任何來電或短訊時，有些手機用戶會感到自卑、焦慮。
「人有我冇，好瘀㗎嘛」
Holly坦言有類似經驗，「我啲朋友都笑我有『手機敏感症』，因為我成日忍唔住拎部手機望吓，睇吓有冇人SMS我。」Holly承認迷上打SMS，甚至因此牽動情緒：「試過去唱K，成班朋友個個部機都係咁響，但成晚冇人傳SMS俾我，我會唔開心，人有我冇，好瘀㗎嘛！」
勿以為只有青少年愛SMS，成年人也會上癮，上班一族阿偉同樣沉迷SMS，「喺辦公室唔方便傾電話，咪用SMS同女朋友傾偈囉！」阿偉平均每日發出20個SMS，雖然用量不算超級，但倚賴手機情況明顯，即使將手機放在桌上，也會「囉囉攣」禁不住時常拿起手機查看有否收到SMS，「已經成為習慣，好似戒唔甩。」
中文大學精神科學系副教授李誠表示，SMS在港已成潮流，「亞洲人冇外國人咁直接，用手機傳短訊最適合，可以表達自己又唔需要擔心對方點樣回應，係一種被動性嘅主動行為。」SMS在年輕人圈子大行其道，他認為與青少年成長期需獲別人認同有關。
李誠說，「𠵱家唔玩SMS、收得少就好似好老土咁，其實SMS數量喺青少年圈子，就好似代表住成年人社交圈子夠唔夠闊，愈多人SMS你好似威啲咁。」他說人際關係惡劣及財政困難等人，是手機SMS成癮高危一族，若因為SMS引發負面情緒，如暴躁不安、焦慮緊張等，已是上癮警號，應盡快求醫。
