自由黨呢幾年都好事多，因為佢哋好多黨員都仔大女大，好似田少咁，就做埋阿公，而周梁就好快榮升外母。
噚日有消息話佢個愛女周智美快將出閣，嫁畀一位喺美聯社做攝影嘅記者余偉健，八方第一時間恭喜佢，周太喺電話笑得好開心，簡直係女大女世界，佢話婚禮會喺泰國舉行，係個女同女婿搞嘅WeddingParty，由佢哋兩人全權負責同決定，唔使佢同周明權擔心。
周太有兩個女，智美做過香港電台，同八方可算係同行，周太話相信佢兩個係工作時認識，佢話，個女對攝影同文物都好有興趣，未來女婿亦好有藝術家氣質，總之好襯啦。新外母有讚冇彈，八方都為周太開心，女婿錫個女就得啦，其他都唔重要。
周太喺香港人面好廣，佢話，唔會請客擺酒咁鋪張，同屋企人食番餐就一定會。