將喺2012年成立嘅中文大學新書院──晨興書院，即將上任做院長嘅諾貝爾經濟學獎得主莫理斯（SirJamesMirrlees）噚日喺校長劉遵義陪同下會見傳媒，佢哋就好老實講，無論新書院嘅選址、所需要嘅經費，全部都未定，唯一定咗嘅就係所有入新書院嘅學生，都要做為期三個月或一個暑假嘅義工，等佢哋可以學識回饋社會。
呢位地位超卓、年近70歲嘅莫理斯教授話，由𠵱家起會留守中大，協助籌辦新書院，佢太太已經喺英國劍橋大學退休，都會嚟香港陪佢一齊搞新書院。莫教授仲話，將來會叫多啲國際上有聲望嘅老友加入新書院助陣，至於有邊幾個？佢話未諗到呀。
講完新書院，八方見成個暑假都無見劉校長，咪多口問吓佢暑假去咗邊玩，點知劉校長即刻好敏感，話去嘅地方多到講唔晒，又話唔講私人事，問吓啫，校長唔使咁敏感呀！