原子鏸、劉心悠、利嘉兒同連凱等前晚去咗又一城，出席一個世界巡迴時裝展活動，一眾出席嘉賓都有份各自為玩具公仔設計服飾，其中原子鏸就將愛犬Seth個名放咗落佢設計嘅公仔衫度，搞到愛犬見到呢個老翻Seth嗰陣都忍唔住呷醋。
不停否認事件
日前有雜誌報道話原子鏸誤墮傳銷陷阱，因為貪免費身體檢查而買咗傳銷商嘅健康產品，仲四周圍向人推銷，前晚問佢係咪有呢件事，原子鏸聽完之後一臉茫然，似乎完全唔知發生乜嘢事，只係不停話冇，又話冇做身體檢查同抽血。問原子鏸驚唔驚會同美容公司嘅合約有牴觸時，佢就話：「我淨係幫美容公司做脫毛代言人，所以同其他產品係冇牴觸。」
早排本報影到原子鏸同貌似荷李活男星畢彼特（BradPitt）嘅外籍男士食飯撐枱腳嘅相，馮仁昭問佢係咪拍緊拖？佢就話個男仔只係朋友嘅朋友，大家唔係拍拖喎。
此外，同場嘅劉心悠就為公仔設計婚紗，佢話覺得着婚紗好sweet。提到緋聞男友郭品超同女友仍未分手，心悠話都知道佢哋拍咗好耐拖，佢本人都希望可以搵番個啱自己嘅男朋友。
