立法會近期嘅茶杯裏的風波，莫過於係有人放風話某某黨加埋政府想借陳鑑林郁卿姐，搶番財委會主席，最近更盛傳幕後搞事者就係田少，係佢支持鑑林去爭位喎。
噚日田少被問及呢個傳言時一頭霧水，仲喊寃話其實做主動嘅係鑑林喎，事關自己上京前突然收到陳鑑林電話，話想做財委會主席，叫自由黨多多支持。
田少覺得，民建聯同自由黨既然係兩大政黨，自由黨有得掌內會，財會都好應該由民建聯揸fit，咁樣好似有代表性啲，唔係話佢哋覺得卿姐做得唔好，希望卿姐唔好誤會。
況且自由黨一路都無投票支持卿姐，今次都唔例外，但佢澄清，真係無叫陳鑑林去選，亦無幫過手拉票，總之唔關佢事。換言之，只要泛聯盟肯畀票陳鑑林，卿姐就要落莊，不過陳智思話佢哋下星期至開始傾，結果係點下星期先揭盅。至於煲呔同唐唐，就死都唔認有份郁卿姐，因為係人都知卿姐唔好惹。
呢期因為銷售稅同舊黨友唐唐刀光劍影，為免有傷和氣，田少𠵱家見到唐唐都唔會提銷售稅喇。但佢又唔抵得咁話，唐唐早前撰文同佢展開筆戰，但相信篇文肯定係「請槍」而成，「佢中文邊有咁好」。咁都要攞番個彩，田少真係田少，無得改。