馬浚偉（馬仔）和楊思琦主演的無綫新劇《天機算》昨日試造型。因有演員經常遲到，馬仔提議發起「全劇演員守時大行動」矯正遲到歪風，楊思琦表示贊同，矛頭直指缺席的陳浩民。
無綫劇集《天機算》昨日在將軍澳電視廣播城舉行開鏡拜神儀式，男主角之一的陳浩民因病缺席。據知《天》劇開拍至今三個星期，有演員經常遲到，連累同劇的工作人員遲收工，男主角之一的馬浚偉被問到同劇演員經常遲到時說：「我唔係咁鍾意，我自問做唔好，唔敢求人，我對時間觀念睇得好重，個別同事遲到令人遲收工，對守時嘅同事唔公平，仲會掀起一股遲到風氣，大家會鬥遲。」
馬仔認為拍劇最重要是士氣，他說：「我以前拍嘅劇，好似《鐵血保驃》、《滙通天下》都好有氣勢，大家眾志成城，我做足自己守時，唔好做壞規矩。」有演員曾經試過遲到兩個鐘，馬仔說：「偶爾遲到都有，15分鐘，畀盡半個鐘，超過就唔好。」馬仔可有跟監製提過這事？他說：「導演已經同監製講，都係為咗整頓拍攝士氣。」馬仔如此直接，不怕會傷及同事之間的感情？他理直氣壯說：「呢個係做嘢態度，遲到同事都會傷害我哋感情，我唔會擔心，我唔係惡意，我堅持呢個態度，我係對事唔係對人。」
監製：唔只佢一個
楊思琦則說：「我冇受到牽連，我冇等過人，大家合作好好。」得知馬仔有意發起「全劇演員守時大行動」，她贊成說：「我都要向馬仔學習，佢真係好守時，好有原則，好認真，咁大家守時就可以早收工啦！」
監製徐遇安被問到陳浩民缺席一事時說：「佢病咗！」其後他談到演員遲到一事則說：「唔只佢，仲有其他演員，有男有女，唔只佢一個，係有影響製作進度，我會同個別演員溝通。」
採訪：楊潔雯
攝影：葉君海
