曼城領隊皮亞斯不愧係「癲佬（Psycho）」一名，球隊剛啱喺英聯盃第二圈，被英乙下游球隊車士打菲特以2:1淘汰，兼且近16場比賽輸咗13場，隨時被炒魷，仍然話「我頂得順！」真係硬淨啊！
曼城嘅頹勢由上季3月中聯賽輸畀韋根開始，之後聯賽取得1勝9負，最後僅以尾6唔使降班，皮亞斯仲有得留低真係大話夾好彩喇！點知曼城去到今季依然冇起色，大事擴軍之下，6場波淨係贏得1場排尾4，近3場比賽更係3連敗，皮亞斯領隊個位真係危危乎喇！
但係呢位前英格蘭國腳乜風浪未見過呢？佢對記者大大聲話：「我的確係處於壓力之下，但係我足以應付所有嚟緊嘅挑戰。」呢位90世界盃4強對德國射失12碼嘅後衞仲話，只要自己再落多兩錢肉緊，就乜事都冇㗎喇！
對韋斯咸關乎去留
曼城嚟緊聯賽會對同樣近況麻麻嘅韋斯咸，呢場好可能係皮亞斯嘅生死之戰，再輸的話真係分分鐘係咁先！不過呢位領隊話未驚過，「我會堅持落去，永不退卻！」
對於𠵱家形勢佢有句說話好有哲理：「職業足球從來都唔係好似鴕鳥咁，埋個頭落沙度，然後希望困難自動遠離。」
「人生在世難免困難重重，高低起跌亦係常事。不過皮亞斯就提醒各位唔好逃避，要堅強解決問題。希望今個禮拜六，曼城可以擊敗韋斯咸，皮亞斯亦可以大步檻過喇！」