香港上市公司商會噚日慶祝四周年紀念，主席何猷龍開咗記者會，介紹過去一年會務。佢話，該會公司會員已有138間，包括藍籌、紅籌同本地公司，其中六間更加係恒生指數成份股公司，佔恒指市值20%；而上市公司會員總市值已突破1.1萬億元，相當於本港市場嘅11%。
問及四年以來該會為會員成功爭取到乜嘢，副主席邱達根舉電子通告為例，港交所答允免除上市公司嘅通告要喺報章刊登嘅規限，容許可以電子形式發報，而且該會嘅網站，好有可能成為認可發報通告網站之一。
該會常務委員會，有唔少本地富豪第二代出掌，噚日就嚟咗個新面孔，就係玩具大王蔡志明細女蔡加怡，佢身穿吊帶裙，立即成為記者會上最矚目嘅人物。