剛戰特攻隊重注米堡失手，今次輪到小弟主打，希望收回失地，今次重心提供單W有分頭嘅韋根從盃仔出局中反彈贏屈福特。冷選博波膽，拜仁及阿仙奴「主其他」。
文：蘋果波神
前屆英冠聯冠軍嘅韋根，甫升班就給予球迷驚喜，雖然最後冇辦法爭到前列踢歐洲賽，但盤路就認真唔錯。踏入今季，韋根雖然暫時喺聯賽只得1勝1和2負，但所失分嘅3場比賽都係作客，而且佢哋嘅表現亦唔錯，並冇「升班馬隔季現形」呢個毛病，連雷丁都敗走，我個人認為韋根今季仍有爭入前10名嘅資格。喺星期六嘅聯賽佢哋主場迎戰實力平平嘅屈福特，可放心捧場。何況佢哋周中喺聯賽盃輸畀主場特佳嘅克魯，實在不足為據，相反仲會換來今場嘅贏波賠率好分啲㖭。
講到陣容，韋根今屆放走咗後衞軒索斯、占邦達、布拿特同中場卡維拿治等，但補入咗中場蘭沙特、前鋒希斯基，又借得厄瓜多爾中場路爾斯華倫西亞，所以論人腳，實力並冇削弱到。仲有舒卓拿同麥高洛治近仗都有「士哥」，對射門鞋好似鍍咗金咁，真係無辜負開體育用品店起家、賣波boot出晒名嘅班主。
JJB球場威力有保證
另外，韋根球員鬥志好，而喺佢哋嘅主場JJB球場比賽，一向有保證，喺上季頭8場主場比賽，韋根仲錄得5勝2和1負嘅佳績，等閒球會都唔使旨意可以喺JJB球場度搶分。
乜嘢係等閒球會？我諗話屈福特係相信冇人有異議啩！呢支「升班馬」今屆人腳普通，而且仲未喺聯賽「開齋」，最慘嘅就係從開「咧」幾場波所見，屈福特嘅所謂取分之匙好似馬龍京治，或者上屆喺英冠同禾確特齊名、被譽為英格蘭新希望嘅攻擊中場艾殊利楊格等，睇嚟都係似英冠球員貨色，徒靠體力加拼勁，要喺英超發圍，似乎有難度。
拜仁搵亞琛祭旗
至於冷選係喺星期六德甲主場對亞琛嘅拜仁慕尼黑同英超阿仙奴迎戰錫菲聯。兩大班霸都算冷選，係真唔係呀？冇錯，家陣唔係要大熱單W或者「主勝」呢類擦鞋仔貼士；而係要「主其他」波膽。拜仁上場作客弱隊比勒費爾德，竟然喺領先1球下反輸1:2，爆咗個6倍冷W；而佢哋主席路明尼加事後嬲到爆，話明唔准有第2次，仲話喺嚟緊3場波對亞琛、國際米蘭同禾夫斯堡，會畀番球迷一個交代；咁即係話，佢哋準備搵亞琛嚟祭旗啦！
仲有，拜仁之前喺慕尼黑奧運球場踢聯賽，例開「主其他」，但去夏搬入安聯後，一場「主其他」都未開過，呢場對亞琛係時候「開齋」。至於阿仙奴今季仲未喺新球場聯賽贏波，上次打冧曼聯嘅氣勢應可延續，下周中歐冠盃迎今非昔比嘅波圖，實在唔使怕，只要亨利同尹佩斯傷癒，今場有力「士哥」，不讓眾師弟上場打敗曼聯叻晒。
投資特攻隊金句
周中盃仔勝負實不能太過認真，重返聯賽無論盤路及軍容，反而是投注人士參考勝負的最強數據。