晶門科技（2878）今年4月頭由3.80元附近開始跌，次次反彈都唔夠力，噚日最低碌到1.40元先見買盤接貨，收市報1.45元，升4仙。
呢隻傷盡股民心嘅半導體股，愈跌愈多蟹民談論。
喺「香港討論區」入面，網友Yatw問：「2878到咗底？迴光反照？」kamwing1506認為：「睇怕係，人人都怕嘅時候佢就嚟料。」
喺「Yahoo討論區」內，94167就有唔同睇法：「我諗短期都唔使諗有明顯反彈，就算有咪係班驚青散戶止蝕離場，然後有心賺大錢嘅芬佬又低價掃入……各位揸貨嘅散戶，我哋要對佢有信心，我哋今次唔係買電盈（008）或者永義（1218），輸極有個譜，長遠係會守得雲開嘅！」
1.7元有阻力
大摩前幾日發表報告，指晶門目前估值合理，予「與大市同步」評級，目標價1.6元，但認為走勢仍未能確定明朗，不宜過份看漲該股。
圖表上，晶門現價MACD三底大背馳，技術超賣，短線博反彈可以執些少，但1.70元唔易升穿，有微利要走。
余文