阿里巴巴創辦人兼首席執行官馬雲，噚日應香港總商會之邀，嚟香港發表演說。佢唔單只係企業家，仲係出色嘅演說家，會上發表豪情壯語，預言未來十年，全球商業活動八成喺互聯網進行。
佢勸喻港商，要緊貼大勢所趨，將業務搬上互聯網，為網上貿易提供配套網上服務，晉身為新型中間人，否則屆時將災難臨頭。
佢又預言，十年後，全球最具規模嘅三大互聯網公司中，有一家嚟自中國，阿里巴巴正朝呢個目標進發。屆時全球五百強企業中，亦會有一家嚟自國內民營企業，呢個亦係阿里巴巴爭取嘅目標。
自從去年阿里巴巴收購咗雅虎中國，佢話整年忙於整頓雅虎嘅舊文化，將員工以往抱舊心態，改變為擁抱變化，咁樣先至可以生存於競爭激烈嘅社會。亦係因為咁，佢多咗十三條白頭髮！