阿仙奴作客擊敗曼聯，贏波功臣除一箭定江山嘅艾廸巴約，當然唔少得德國門將列文；列文上下半場各有精采撲救，包括上半場「以頭相許」，擋出基斯坦奴朗拿度（C朗）勁射；下半場臨完場，又救出蘇斯克查嘅快射，係阿仙奴唔失波最大功臣。
兩次使出「如來神掌」
不過列文卻惹上官非；事緣列文喺比賽期間被C朗侵犯，球證判阿仙奴獲得罰球，但列文仍忿忿不平，將水樽踢向觀眾席。事後一名男子報案，指佢個仔俾列文踢出嘅水樽擊中，曼市警方亦已展開調查。
其實列文「躁底」早有前科，在youtube.com就有一段名為《JensLehmann-Crazygoalkeeper》的短片，剪輯今年2月，阿仙奴對保頓嘅聯賽中，列文嘅躁狂片段。列文喺該仗共有兩次動粗，第一次就係佢同保頓前鋒馬特贊臣雙雙倒地後（圖1），列文乘機「抽水」，多次用手壓住馬特贊臣，要旁證勸阻先收手。第二次動粗嘅主角又係列文同馬特贊臣，事緣馬特贊臣想阻止列文快開罰球（圖2），列文竟施展「如來神掌」，將馬特贊臣硬生生推跌。
對於列文踢水樽惹官非，本地球迷反應不一；喺香港討論區（ http://www10.discuss.com.hk/）網友凸務之王表示：「條友成日都神神化化，都唔知係唔係俾C朗射完，射到儍埋。」不過亦有網友支持列文，網友阿茲特克表示：「超，啲曼迷輸波無品老屈佢啫。」
hitrate：77,029次
