秋風起，係時候食煲仔飯喇！不過食嚟食去都係甚麼臘腸排骨、滑蛋牛肉，好鬼悶；有15年川菜經驗嘅威哥好諗頭，整咗幾味創新川味煲仔飯，仲自行調校辣汁代替豉油，創意攞滿分就梗㗎嘞，難得仲要煲煲收你$15，普通茶餐廳嗌個爛鬼鳳爪滑雞煲仔飯，無$30都唔使落樓啦，抵撐喎！
記者：黃若茵
攝影：楊錦文
模特兒：Algie、Sindy、Pakho
正宗四川菜做法
去鐵樹街搵「川味港」四川菜館，點知行過龍，皆因舖面睇落一啲都唔似食肆，一邊係廚房，另一邊先係有枱有櫈細細間嘅舖位，環境的確稱唔上幽雅，感覺甚至有點地踎，不過有15年煮川菜經驗嘅大廚威哥好有料到：「我17歲入行，之前喺『喜湖海逸酒店』做川菜，師傅係四川人，我學到唔少正宗四川菜做法。喺香港買到嘅調味料味道唔夠好，一定要用番四川製嘅調味料先啱味，所以我每個月都要返大陸攞貨，咁先做到真正四川菜風味。」
煲仔飯撐飽個肚
老實，未聽過四川菜有煲仔飯，威哥擺到明搞搞新意思：「我見呢排天氣開始轉涼，做煲仔飯係時候。講真，連我自己都未見過四川風味煲仔飯，咪試吓用四川材料去做，有啲新意囉。」新意就有喇，但你做開四川小菜，會唔會搞唔掂煲仔飯先？「做煲仔飯最緊要控制火候，同埋要加少少油喺啲飯度，我做咗15年廚，點會搞唔掂？而且我發現唔少客人，食飽之後飲啤酒，飲到最後都鍾意叫個擔擔麵或者飯撐吓胃，所以我咪整個煲仔飯，等啲客人多個選擇囉。」今次4款新口味煲仔飯做優惠，每個$15，咁抵，一定食得飽啦。
土產瓦煲炭火爐做飯焦
鍾意食煲仔飯嘅人，多數會食埋香噴噴脆卜卜嘅飯焦，咁先夠風味。威哥話：「要煲出飯焦，最好用土產瓦煲同炭火爐，因為瓦煲質地疏鬆粗糙，表面有好多細密小孔，令熱力能夠滲透，炭爐火力唔及煤氣同石油氣爐，所以先能夠令煲入面嘅米有足夠時間吸水同埋透氣，炭火嘅香氣亦隨住小孔滲入米飯，令米粒可以變香口飯焦。」亦有唔少人鍾意將飯焦泡茶或泡湯，香氣夠晒濃郁。老一輩嘅人甚至會將炒香嘅臘肉粒、菜脯粒等放入飯焦內，搓成飯團嚟食。
泡椒田雞煲仔飯$15
呢個煲好足料，足足用咗成隻田雞，田雞難得好肉地又嫩滑，加埋自己醃製嘅泡椒，每啖都食到酸辣味，保證開胃。
尖椒黃鱔煲仔飯$15
加尖椒、辣椒一齊煲，黃鱔滲出辣味，但又不至太辣而掩蓋本身鮮味。一般茶餐廳好少做，就算有起碼賣$40，𠵱家平一截，抵！
泡椒雞煲仔飯$15
唔用嚡口雞胸肉，用嘅全部都係雞髀肉，難怪食落咁嫩口，食呢個雞煲我鍾意加多啲辣汁，咁先可以帶得起雞肉味。
山椒牛肉煲仔飯$15
牛肉超入味，嗜麻辣者必食，咬啖野山椒，初頭覺得好鬼酸，但舌頭隨即感覺到辣味，只咬一小口，我條脷麻痹足1分鐘。
蒜泥秋刀魚$15
秋刀魚炸過後，再加自製蒜泥調味，秋刀魚都算幾大條，仲好好肉，魚皮食到脆卜卜，非常香口，送酒一流。
酸辣蛇羮$15
蛇羮以酸辣湯做湯底，但要有心理準備，真係幾辣㗎！每碗都勁足料，除蛇肉外，仲有冬菇絲、豆腐、豬紅等配料。
食客有Say
川味港（98135761）
地址：大角嘴鐵樹街46號地下
營業時間：6:00pm-2:00am
座位：30個
交通：地鐵奧運站
人均消費：$60
最好賣：香辣蟹，日賣20份
註：每枱人客只可揀選一款煲仔飯，及一份秋刀魚或一份蛇羮。煲仔飯每日供應50份，售完即止。優惠期至9月30日。